Tónlistargoðsögnin Sir Elton John hefur lagt sitt lóð á vogaskálirnar við að miðla málum í fjölskyldudeilu Brooklyn Beckham og eiginkonu hans, Nicolu Peltz, við foreldra hans, David og Victoriu Beckham. Elton, sem hefur verið vinur hjónanna í þrjá áratugi og er guðfaðir Brooklyn, bauð parinu unga í dýrindis hádegisverð á veitingastaðnum La Guerite í Suður-Frakklandi ásamt eiginmanni sínum, David Furnish.

Samkvæmt heimildum The Sun nýtti sir Elton tækifærið til að ræða stuttlega um ósættið innan fjölskyldunnar og hvatti guðson sinn til þess að reyna að sættast við foreldra sína. Heimildarmaður segir að Elton taki hlutverk sitt sem guðfaðir alvarlega og vilji einungis frið frá fjölskyldudeilunum . „Hann tekur ekki afstöðu – hann elskar Brooklyn og hefur gaman af Nicolu. Hann vill bara að allir verði sáttir.“

Nicola hefur þó áfram vakið athygli fyrir að halda góðri fjarlægð  frá fjölskyldunni. Hún og Brooklyn munu hvorki koma fram í væntanlegri Netflix heimildaþáttaröð Victoriu né hafa þau nýlega hitt systur Brooklyn, Harper, þrátt fyrir að vera í London skammt frá heimili fjölskyldunnar.

Þrátt fyrir allt virtist stemningin góð við matarboðið – Nicola glöð með Aperol Spritz í hendi og Elton sem greiddi reikninginn sem var í stærra laginu.

Hvort tónlistargoðsögnin nái að sameina fjölskylduna á ný er enn óljóst – en hann virðist leggja sig fram við að reyna.