Söngkonan Birgitta Ólafsdóttir, eða BIRGO eins og hún er betur þekkt, flutti lagið Ég flýg í storminn á fyrra undanúrslitakvöldi Söngvakeppni sjónvarpsins og er óhætt að segja að það hafi verið aldeilis stormur í kjölfarið.

Birgitta komst ekki áfram í úrslit í kjölfar símakosningar og vakti það mikla athygli, undrun og jafnvel hneykslun hjá Eurovision aðdáendum um Evrópu alla.

Birgitta er gestur vikunnar í Fókus, spjallþætti DV. Það er hægt að horfa á þáttinn hér að neðan eða hlusta á Spotify og öllum helstu hlaðvarpsveitum.

„Ég hef alltaf viljað taka þátt í Eurovision og það hefur verið minn stærsti draumur frá því að ég var lítil,“ segir Birgitta.

„Ég fékk skilaboð frá Shawn Myers á Instagram, sem er algjör Eurovision-séní. Hefur sent lög fyrir fullt af löndum inn í keppnina. Ég bara missti vitið þegar hann heyrði í mér, að hann vildi gera lag með mér,“ segir Birgitta hlæjandi.

Þetta var önnur tilraun þeirra en þau sendu inn lag líka fyrir keppnina í fyrra en komust ekki áfram. „Það var náttúrulegt að halda áfram og sníða eitthvað alveg að röddinni minni.“

Rosaleg viðbrögð

Eins og fyrr segir létu viðbrögðin hérlendis og erlendis ekki á sér standa þegar Birgitta komst ekki áfram. Myndbandið af flutningi hennar frá kvöldinu hefur fengið yfir 52 þúsundir áhorfa og yfir 550 manns hafa skrifað athugasemd við það.

Sjá einnig: Eurovision-samfélagið á Íslandi og erlendis nötrar eftir Söngvakeppnina – „Ég mun hunsa Ísland í ár. Núll stig!“

Aðspurð hvernig henni hafi liðið þegar hún las allar fallegu kveðjurnar og sá stuðninginn sem hún var að fá segir Birgitta: „Ég var bara… Vá.“

Hún kaus að líta á þetta með jákvæðum augum. „Ég hugsaði að þetta væri miklu betra en að fara í úrslitin og lenda kannski í þriðja og fjórða sæti […] Svo mikil ást og stuðningur frá öllum. Ég gat ekki verið leið,“ segir hún brosandi.

Missti ömmu sína sama kvöld

Kvöldið var einstakt en líka erfitt.

„Sama kvöld lést amma mín. Þetta var alltaf draumurinn okkar, að komast í Eurovision og syngja. Hún var orðin mjög veik, en það eina sem hún sagði á kvöldinu: „Ég þarf að sjá Birgittu, ég þarf að sjá hana syngja.“ Hún fékk að sjá mig og kvaddi svo þennan heim,“ segir Birgitta.

Amma hennar var mjög stolt af henni. „Síðustu orð hennar voru: Fallega, fallega Birgitta mín,“ segir hún brosandi.

Birgitta ætlar alls ekki að gefast upp og stefnir að taka aftur þátt á næsta ári. „Ef ég á að vera alveg hreinskilin þá erum við byrjuð að vinna í lagi fyrir næsta ár,“ segir hún hlæjandi.

Fylgdu Birgittu á Instagram, TikTok og hlustaðu á tónlistina hennar á Spotify.