Lagið komst áfram á úrslitakvöldið í gærkvöldi en mikil mótmæli fóru fram í Malmö í Svíþjóð þar sem keppnin er haldin. Baulað var þegar Eden flutti lagið en það virðist ekki hafa haft mikil áhrif á þá sem greiddu henni atkvæði.
Samkvæmt Eurovisionworld er Ísrael nú í 2. sæti yfir líklegustu sigurvegara keppninnar og eru vinningslíkur þeirra nú metnar 25%. Hefur lagið tekið mikinn kipp í veðbönkum eftir að úrslitin í gærkvöldi lágu fyrir. Króatía er sem fyrr sigurstranglegast og eru líkurnar á sigri þeirra metnar 38%.
Veðbankar hafa í gegnum tíðina verið nokkuð sannspáir en það verður án efa fróðlegt að sjá hvernig fer á laugardagskvöldið.
Hefðin er sú að sigurvegarar Eurovision haldi keppnina árið á eftir. Fari svo að Ísrael vinni er þó alls óvíst hvort keppnin fari fram þar í ljósi ástandsins fyrir botni Miðjarðarhafs. Færi það væntanlega eftir því hvernig mál þróast næstu vikurnar. Þá er ekki víst að aðrar þjóðir, Ísland til dæmis, myndu kæra sig um að fara til Ísraels í ljósi atburða síðustu vikna.
Úkraína vann keppnina vorið 2022 en keppnin var ekki haldin þar í fyrra vegna innrásar Rússa.
