Óhætt er að fullyrða að maður gærdagsins hafi verið Viktor Traustson, 35 ára gamall hagfræðingur, sem mætti eins og þruma úr heiðskíru lofti í Hörpu að morgni dags og tilkynnti landkjörstjórn að hann hefði safnað nægilegum fjölda meðmælenda til að bjóða sig fram sem forseta íslenska lýðveldisins.

Viktor hafði ekkert auglýst og verið lítt áberandi á samfélagsmiðlum en hann græjaði hlutina á gamla mátann, hitti á fólk á förnum vegi og bað það um að veita sér brautargengi.

Frambjóðandinn ungi, sem er ný orðinn 35 ára sem er skilyrði fyrir framboði, var þó raunsær í samtali við DV og sagði það vel geta farið svo að meðmælendurnir yrðu ekki nógu margir. Hann hefði til að mynda safnað akkúrat fjöldanum sem til þurfti í Norðlendingafjórðungi og ef ein undirskrift er þar ógild þar þá þýðir það að Viktor uppfyllir ekki kröfurnar.

Hvað sem verður er ljóst að Viktor kom sér og stefnumálum sínum sannarlega á kortið með óvæntum hætti.

Þannig vill til að systir Viktors er einn þekktasti áhrifavaldur landsins, það er engin önnur en dansarinn Ástrós Traustadóttir sem er meðlimur í þekktasta vinkonuhóp landsins, LXS ásamt Birgittu Líf Björnsdóttur og Sunnevu Einarsdóttur, svo einhverjar séu nefndar.

Viktor virðist ekki hafa nýtt sér tengslanet systur sinnar við að safna undirskriftum þannig að hann á nóg inni í kosningarbaráttuni ef til hennar kemur.