Hljómsveitin Hr. Eydís gaf út nýtt föstudagslag í dag og fengu gest til liðs við sig.

„Það er frekar sérstakur föstudagur í dag því það er aldeilis sérstakur gestur sem syngur með okkur. Eiginlega alveg einstakur, því það er snillingurinn Björgvin Franz Gíslason. Okkur hefur lengi langað að fá hann í heimsókn því ekki bara er hann drengur góður og frábær listamaður heldur er hann mikill ´80s maður.

Við ákváðum í sameiningu við Björgvin Franz að taka lagið Love & Pride með hljómsveitinni King og ætlum líka að sjálfsögðu að reyna að plata Björgvin Franz til þess að gesta með okkur á tónleikunum „Alvöru ´80s partý“ í Bæjarbíói 24. febrúar,“ segja félagarnir í Hr. Eydís.

Svo virðist sem Björgvin ætli að mæta því hann er alsæll með lagið og í færslu á Facebook segir hann draum sinn hafa ræst:

„Já draumar geta ræst! Ég hafði í rælni samband við Hr.Eydís enda mikill aðdáandi. Þeir voru svo almennilegir að leyfa mér að taka eitt af mínum uppáhald one hit wonders frá þessum dásamlega áratug og eins og þeir reyni ég að ná þessum einstaka raddblæ Paul King enda enginn með rödd eins og hann. Hef ekki enn fundið 80s cover band sem nær þessu sándi eins fullkomlega og Hr.Eydís og Örlygur getur sungið þá alla!!! Þeir eru einstakir (fyrir utan það hvað þeir eru skemmtilegir). Mæli með að þið fylgið þeim á samfélagsmiðlum og sjáið hvað þeir eru búnir að covera með fleiri frábærum gestasöngvurum. Njótiði helgarinnar og svo sjáumst við vonandi í Bæjarbíói laugardaginn 24.“

„Lagið smellpassar annars í flokkinn „one hit wonder“ enda er þetta eina lagið með sveitinni sem einhver man eftir. Love & Pride er ekki mikið spilað í dag og kannski man enginn yfir fertugu eftir þessu lagi, en á sínum tíma var þetta risastórt, enda alveg frábært lag! Lagið kom út upphaflega í apríl 1984 og varð ekkert sérstaklega vinsælt, bæði hljómsveitin og útgefandinn varð fyrir nokkrum vonbrigðum. Hins vegar kom hljómsveitin fram og flutti lagið í einhverjum sjónvarpsþætti í lok árs 1984 og í kjölfarið freistaði útgáfan gæfunnar og endurútgaf lagið í febrúar 1985. Það var góð hugmynd því lagið skaust þá beinustu leið upp breska vinsældalistann, alla leið upp í annað sætið.

Það var alveg magnað að fá Björgvin Franz til okkar, hann lifnaði í raun við sem Paul King söngvari hljómsveitarinnar King sem flutti lagið á sínum tíma. Það vantar sko aldeilis ekki hæfileikana í þennan dreng,“ segir Örlygur Smári söngvari og gítarleikari Hr. Eydís og bætir við kíminn „….svo er hann með þykkt og fallegt hár sem við öfundum hann allir af.“

Fylgja má Hr. Eydís á Facebook, Instagram og YouTube.