USA Today greinir frá því að ungir karlmenn séu að innbyrða svokallaða „hunangspakka“ sem eru markaðssettir sem eins konar kynlífsbætiefni. Þetta á að vera „hreint og náttúrulegt“ en læknar vara neytendur við og segja efnið geta haft skaðleg áhrif á heilsuna.
Umræddur hunangspakki er sagður auka frammistöðu viðkomandi í svefnherberginu og auðveldar honum að viðhalda góðri reisn.
En samkvæmt USA Today hafa fundist önnur efni í mörgum hunangspökkum, efni sem finnst í lyfjum á borð við Viagra.
Þessi efni geta valdið alvarlegum aukaverkunum, eins og að blóðþrýstingur fari skyndilega upp úr öllu valdi, sjóntruflunum og jafnvel hjartaáfalli.
Það sem veldur sérfræðingum áhyggjum er að umræddir hunangspakkar eru ekki undir eftirliti matvæla- og lyfjastofnunar (FDA) Bandaríkjanna, heldur er þetta flokkað sem bætiefni.
„Þetta er ruglað. Þú getur farið í hvaða áfengisverslun eða bensínstöð sem er og keypt svona hunangspakka og þú hefur ekki hugmynd um hvað er inni í honum,“ sagði læknirinn Jesse Mills við USA Today.
Læknar segjast sérstaklega hafa áhyggjur af því að ungir karlmenn séu að innbyrða hunangspakkana með áfengi, sem er vinsælt að gera í háskólapartýjum.
Karlmenn geta upplifað risvandamál á öllum aldri en það er sjaldgæft meðal ungra karlmanna. Þrátt fyrir það er vinsælt hjá ungum karlmönnum að taka inn efni á borð við hunangspakkana til að auka frammistöðu í svefnherberginu. Á bak við liggur gjarnan kvíði eða pressa að standa sig, gjarnan er bent á klám í þessu samhengi og hvernig það hefur gefið karlmönnum ranga hugmynd um hvað sé eðlilegt og hvað ekki.
