Í bókinni segist Melania hafa verið stödd í gleðskap vegna tískuvikunnar í New York árið 1998, en þá var Melania aðeins 28 ára en Trump 51 árs.
Melania rifjar upp að með Donald í för þetta kvöld hafi verið „aðlaðandi ljóska“ en það hafi ekki skipt neinu máli þegar hann vatt sér upp að henni, rétti út höndina og kynnti sig. „Hæ. Ég er Donald trump. Gaman að hitta þig.“
Melania segir að hún hafi vissulega þekkt nafnið en að öðru leyti vitað lítið um manninn.
„Augu hans fylltust af forvitni og áhuga og hann greip tækifærið og settist í sætið sem var laust við hliðina á mér og byrjaði að spjalla. Hann spurði mig um tíma minn í New York, heimahaga mína í Slóveníu og ferðalög mín um heiminn.“
Melania segir að þó að spjallið hafi ekki staðið lengi yfir hafi þau einhvern veginn smollið saman.
„Ég var heilluð af þokkanum sem hann bar með sér og hversu yfirvegaður hann virtist vera. Það var mikill hávaði í kringum okkur en á þessu augnabliki leið mér eins og ég væri miðpunkturinn í hans heimi. Þetta var kærkomin tilbreyting frá þessu yfirborðskennda spjalli sem oft einkennir svona viðburði.“
Melania segist á þessu augnabliki ekki hafa gert sér neinar vonir um að samskipti þeirra yrðu meiri, eða þangað til „ljóskan“ sem var með Trump brá sér afsíðis og hann bað um símanúmerið hennar.
Melania segist hafa hafnað beiðni Trumps og það hafi komið honum að einhverju leyti á óvart. Þess í stað bað hún um símanúmerið hans og kvaðst Donald Trump glaður vilja gefa henni það en þó með einu skilyrði.
„Ég gef þér númerið með ef þú lofar að hringja í mig,“ á Donald að hafa sagt við Melaniu þetta kvöld.
Ekki liggur fyrir hversu lengi Donald þurfti að bíða eftir símtali frá Melaniu en þau virðast þó hafa hist fljótlega eftir þetta. Þau gengu í hjónaband árið 2005 og eignuðust soninn Barron ári síðar.
