Alþjóðlega kvikmyndahátíðin í Valladolid á Spáni tilkynnti nú fyrir stuttu að O (Hringur) eftir Rúnar Rúnarsson hefði hlotið verðlaun sem Besta evrópska stuttmyndin á hátíðinni. Með verðlaununum tekur myndin sjálfkrafa þátt í forvali til Evrópsku kvikmyndaverðlaunanna 2025.

O (Hringur), með Ingvari Sigurðssyni í aðalhlutverki, er ljóðræn frásögn af manni sem vill standa sig en hans helsta hindrun er hann sjálfur. Myndin var frumsýnd í keppninni á kvikmyndahátíðinni í Feneyjum í haust og hefur verið á ferðalagi um heiminn síðan.

Það er skammt stórra högga á milli hjá aðstandendum myndarinnar því að þeir standa einnig að baki kvikmyndinni Ljósbrot. En í gær var tilkynnt að Elín Hall hefði hlotið verðlaunin sem besta leikkonan á alþjóðlegu kvikmyndahátíðinni í Chicago.

„Við erum náttúrulega voðalega ánægð með þennan heiður sem myndirnar okkar hefur hlotið. Þetta er mikið til sama fólkið sem er á bak við myndavélina sem kemur að bæði O og Ljósbrot. Við erum ótrúlega stolt af og þakklát þessu fólki. Þessi vegferð sem O og Ljósbrot eru á, eru gríðarleg viðurkenning fyrir Íslenska kvikmyndagerð,” segir Rúnar. 

O er fjórða stuttmynd Rúnars sem vekur athygli á heimsvísu. 

Hinar þrjár eru Krossgötu þríleikurinn (Síðasti bærinn, Smáfuglar og Anna) sem hlutu um eitthundrað alþjóðleg verðlaun og fengu einnig ýmsar aðrar viðurkenningar. Til að mynda var Síðasti bærinn tilnefndur til Óskarsverðlauna árið 2006. 

Eftir Rúnar liggja einnig kvikmyndirnar; Eldfjall, Þrestir, Bergmál og Ljósbrot, sem hafa verið valdar á sumar af helstu kvikmyndahátíðum heims og unnið til fjöldan allan af verðlaunum.