Einkaþjálfarinn og áhrifavaldurinn Guðmundur Emil Jóhannsson varar fólk við að fara í svokallaða sveppatúra, en hann segir að hann hafi farið í slíkan í gær með þeim afleiðingum að hann hafi vaknað á Landspítalanum eftir að lögreglan sótti hann nakinn á Suðurlandsveg.
Í gær var greint frá því að lögreglan hafi handsamað nakinn karlmann sem gekk eftir Suðurlandsvegi í gær, nálægt afleggjaranum inn í Heiðmörk.
Guðmundur Emil segist vera maðurinn og útskýrir málið frekar í yfirlýsingu á Instagram, sem má lesa í heild sinni hér að neðan.
„Ég undirritaður sé mér þess kost vænstan að upplýsa almenning um gjörning þann er ég varð fyrir í gær sunnudaginn 22 september.
Þannig var mál með vexti að ég hafði ákveðið að taka þátt í fara í sveppatúr ásamt tveimur öðrum einstaklingum. Þetta átti að standa frá sirka 8:00 um morgumn til klukkan 14:00. Þetta gera menn og konur til að leita innávið og hefur oft á tíðum skilað góðum árangri. Það er mjög nauðsynlegt að viðkomandi sem tekst á hendur þessa ferð sé undir eftirliti einhverra sem eru alsgáðir og vel með á nótunum.
Það varð ekki raunin á þessum örlagaríka sunnudegi og það sem gerðist frá því ég tek þessa sveppi og ég ranka við mér á bráðadeild Landsspítalans er mér nánast hulið. Það sem ég veit eftir á er að lögreglan bjargar mér af Suðurlandsvegi þar sem ég geng alsnakinn eftir miðjum veginum. Það er í raun mikil mildi að ekki fór verr fyrir mér og öðrum. Ég er mjög þakklátur löggæslu og starfsfólki bráðamóttöku fyrir hjálp þeirra.
Það er nokkuð ljóst að ekki verður farið í svona meðferð á næstunni og verður að brýna fyrir fólki að takast ekki á við ferðalag sem þetta nema með fagaðilum sem kunna til verka því í þetta sinn er það alger guðsmildi að ekki fór verr.
Elsku landsmenn það er auðvitað langbest að anda djúpt að sér góða loftinu hérna hjá okkur á Íslandi og láta þar við sitja.
Með ást og þakklæti
Gummi Emil
Þakka skilning ykkar“
Prófaðu að endurhlaða síðuna ef þú sérð ekki færsluna hér að neðan.
View this post on Instagram
