Maður sem segist vera frá Mexíkó óskar eftir útskýringum á hegðun íslenskrar konu, sem hann hafi verið að spjalla við á Snapchat, í færslu á samfélagsmiðlinum Reddit. Óskar hann í færslunni eftir skýringum á því hvernig standi á því að það gerist iðulega að konan skrái sig inn en svari ekki skilaboðum hans fyrr en nokkrum klukkutímum síðar.

Maður segist hafa tekið eftir því að stundum skrái konan sig inn á Snapchat án þess að svara skilaboðum hans, skrái sig því næst út og svari ekki skilaboðunum síðan fyrr en 3-6 klukkutímum síðar.

Maðurinn segir að í mexíkóskri menningu þætti þetta skýrt merki um að konan hefði lítinn áhuga á honum. Hann segist hins vegar gera sér grein fyrir að munur milli menningarheima geti oft haft áhrif á samskipti og upplifun fólks af þeim. Þess vegna vilji hann með þessu innleggi á Reddit spyrja hvort það sé algengt á Íslandi að skrá sig inn á Snapchat án þess að svara skilaboðum og svara þeim raunar ekki fyrr en mörgum klukkutímum síðar.

„Gefur svona hegðun til kynna skort á áhuga eða er þetta bara venjulegur hluti af menningu ykkar?“ spyr maðurinn og beinir spurningu sinni til Íslendinga.

Að lifa lífinu þurfandi

Maðurinn fær nokkur svör og er honum meðal annars bent á að svoma hegðun á Snapchat gefi almennt til kynna takmarkaðan áhuga, á þeim aðila sem viðkomandi er að spjalla við, hvort sem viðkomandi sé Íslendingur eða frá öðru landi.

Einn aðili er nokkuð beinskeyttur í sínu svari en vill þó meina að þessi hegðun þýði ekki sjálfkrafa að konan hafi lítinn áhuga á manninum:

„Láttu ekki svona maður. Þú er bara einhver náungi sem hún er að spjalla við á netinu. Hún á sér líf. Það ætti ekki að vera forgangsatriði fyrir nokkurn mann að svara skilaboðum frá einhverju fólki á netinu. Heilbrigt fólk er ekki með nefið ofan í símanum öllum stundum. Ef hún er ekki að svara þér þá er ekki um áhugaleysi að ræða heldur er hún að lifa sínu lífi.“

Einn bendir honum á að konan þurfi sinn svefn og enn annar segir einfaldlega:

„Ertu svolítið þurfandi?“