Rapparinn og athafnamaðurinn Sean Love Combs, betur þekktur sem P.Diddy, hefur verið sakaður um að vera ekki lengur altarisdrengurinn sem hann var í æsku. Þvert á móti hefur hann verið sakaður um hrottaleg kynferðis- og ofbeldisbrot sem og um mansal. Lögreglan hefur meint brot hans nú til rannsóknar og fóru viðamiklar aðgerðir í gang í lok mars mánaðar þar sem framkvæmdar voru húsleitir á heimilum rapparans.
Ekki komu ásakanirnar mörgum á óvart enda hefur orðið á götunni áratugum saman verið að Diddy sé einn mesti hrottinn í heimi rapptónlistar. Jafnvel hefur hann lengi verið orðaður við morðið á rapparanum Tupac. Samsæriskenningarnar um rapparann eru þó fleiri og því ekki úr vegi að félagarnir í hlaðvarpinu Álhatturinn fari rækilega yfir málið í ljósi nýliðinna aðgerða lögreglu. Þar bera þeir Diddy saman við annan valdamikinn mann í heimi hinna ríku og frægu, Jeffrey Epstein heitinn. Þar velta álhattar fyrir sér hversu mikinn reyk fólk þurfi að sjá í kringum Diddy til að átta sig á því að þar er raunverulega eldur.
„Mín pæling, ef ég dreg þetta saman, hvað þarf að koma fram mikið af svona dæmum svo fólk fari að átta sig á því að þetta er ekki tilviljun?“
View this post on Instagram
Segir í lýsingu nýjasta þáttar:
„Sean Love Combs, betur þekktur sem Puff Daddy eða P. Diddy hefur verið ein skærasta stjarna tónlistar og menningargeirans vestanhafs undanfarna áratugi. Hann hefur unnið með fjöldanum öllum af stórstjörnum eftir að hafa stigið fram á sjónarsviðið á 10. áratug síðustu aldar.
Lengi vel var hann langsamlega auðugasti tónlistarmaðurinn vestanhafs og allt sem hann snerti virtist verða að gulli. Hann starfaði með stærsta og vinsælasta tónlistarfólkinu, átti í samböndum með föngulegustu og eftirsóttustu konunum í Hollywood og fyrirtækin hans blómstruðu.
Einhverjir hefðu jafnvel gengið svo langt að segja að Diddy væri viðskipta snillingur með einstakt auga fyrir hæfileikum. En er Diddy kannski ekki allur þar sem hann er séður? Getur verið að hann sé með eitthvað verulega óhreint í pokahorninu?
Undanfarnar vikur og mánuði hafa komið fram fjöldin allur af frásögnum frá fólki sem segir farir sínar hreint ekki sléttar af samskiptum sínum við Diddy og hafa þó nokkrir aðilar lýst því hvernig Diddy misnotaði þau kynferðislega. Aðrir hafa lýst dýrslegum og svæsnum kynsvöllum heima hjá Diddy og djöfullegum partíum sem gengu langt út fyrir öll velsæmismörk jafnvel hörðustu glæpamanna. Allt saman var þetta svo tekið upp á myndavélar sem hafði verið komið fyrir í hverjum króka og kima í risa stórri höll Diddy. Tugir ef ekki hundruð myndavéla og myndbandsupptökur fundust við húsleit á heimili Diddy og mögulegt er að hann sé á leið í fangelsi það sem eftir lifir ævi sinnar.
Aðrir hafa sagt frá því hvernig Diddy plataði þá til að afsala sér réttinum yfir lögunum eða tónlistinni sinni og einhverjir trúa því jafnvel að Diddy sé með líf þekktra tónlistarmanna á borð við Tupac og Biggie Smalls á samviskunni. Svo eru uppi sögusagnir um að Diddy beri jafnvel ábyrgð á dauða fyrrverandi konu sinnar og barnsmóður Kimberly Porter.
Flestar fjalla sögurnar þó um hin svæsnu kynsvöll og djöfullegu teiti sem Diddy hélt í höllum sínum og hafa einhverjir gert að því skóna að þarna hafi Diddy verið að reyna að safna saman vafasömu efni af valdamiklu fólki til þess að eiga höggstað á þetta fólk í framtíðinni og mögulega kúga það til allskyns athafna sem það annars væri ekki til í.
Ekki svo ósvipað öllum viðbjóðnum og því sem fór fram í híbýlum Jeffrey Epstein. Getur verið að Diddy hafi haldið þessi kynsvöll og jafnvel hvatt valdafólk til þess að framkvæma allskonar viðbjóð með það að markmiði að kúga þau? Eða var þetta kannski gert til þess að ná myndefni af þekktu tónlistarfólki í niðrandi eða hneykslandi athöfnum svo hægt væri að kúga þau?
Hvað hefur þetta svo að gera með kvikmyndaiðnaðinn og þá sérstaklega dökka karlkyns grínista og leikara ? Eða tengist þetta mögulega djúpstæðum og stækum fordómum fyrir samkynhneigðum innan hip hop heimsins. Allt þetta og svo margt margt fleira áhugavert í þessum nýjasta þætti af Álhattinum, þar sem Guðjón Heiðar, Haukur Ísbjörn og Ómar Þór ræða þá skemmtilegu samsæriskenningu að Sean Love Combs, betur þekktur sem Puff Daddy eða P. Diddy sé Jeffrey Epstein Hip Hop heimsins.“
