Tónlistarmaðurinn Björgvins Halldórsson, kallaður Bó Halldórs, og eiginkona hans Ragnheiður Björk Reynisdóttir, kvöddu ástkæran fjölskyldumeðlim í gær, læðuna Sheilu.
„Við fórum með hana Sheilu okkar í sumarlandið í dag,“ skrifaði Bó á Facebook.
„Hún hefur veitt okkur mikla gleði í mörg ár. Hún var sextán og hálfs ára gömul. Núna síðustu mánuði var farið að draga af henni, hætti að borða eitthvað að viti og drakk mikið vatn og dró sig í hlé. Við erum komin með nokkra reynslu að fara með dýrin okkar í sumarlandið en alltaf er þetta jafn erfitt. Takk fyrir alla hlýjuna sem þú gafst okkur á hverjum degi.“
Dóttir hans, söngkonan Svala Björgvinsdóttir, minntist einnig Sheilu.
„Góða nótt elsku engill. Við munum sakna þín,“ skrifaði hún með mynd af ferfætlingnum á Instagram.
