Það töldust stórtíðindi að Lynne hafi heimsótt dóttur sína fyrr í vikunni en söngkonan hefur iðulega gagnrýnt móður sína opinberlega.
Britney rauf þögnina um heimsóknina á Instagram.
„Elsku mamma mín kom heim til mín í fyrsta sinn í þrjú ár… Þetta hefur verið svo langur tími… Með fjölskyldu er alltaf eitthvað sem þarf að vinna í, en tíminn læknar öll sár,“ sagði Britney og bætti við að það hafi verið góð tilfinning að geta tjáð sig um mál sem hafa brennt á henni lengi.
„Ég er svo glöð að við höfum reynt að ná sáttum. Ég er svo ánægð að við gátum líka fengið okkur kaffi saman eftir fjórtán ár! Förum næst að versla!“
Page Six greindi frá því að heimsóknin hafi verið um hálftími og eiginmaður hennar, Sam Asghari, hafi verið viðstaddur.
View this post on Instagram
Eins og frægt varð var Britney Spears í rúman áratug svipt sjálfræði sínu fyrir tilstuðlan fjölskyldu hennar sem taldi hana glíma við of alvarleg andleg veikindi til að geta borið ábyrgð á eigin lífi. Söngkonan hafði ekki forræði yfir auðæfum sínum, frítíma, atvinnu og varla sjálfsákvörðunarrétt yfir eigin líkama.
Britney hefur borið móður sína þungum sökum vegna þessa og reglulega gagnrýnt hana í fjölmiðlum. Nú virðist hins vegar stríðsöxin vera grafin, að minnsta kosti um sinn.
