„Í fyrsta sinn á Íslandi verður nú hægt að fá kynlífstæki til útláns en um er að ræða samstarfsverkefni kynlífstækjaverslunarinnar Blush og Bókasafn Kópavogs. Þannig gefst einstaklingum tækifæri til þess að prófa og upplifa vöruna án þess að skuldbinda sig tækinu. Hér er jafnframt verið að svara eftirspurn og óskum viðskiptavina Blush,“ svo segir í fréttatilkynningu frá Blush í dag.
Þar er vitnað til þess að eigandi Blush, Gerður Huld Arinbjarnardóttir sé stolt af því að Blush sé þannig orðin fyrsta og eina kynlífstækjaverslun landsins sem býður upp á þennan möguleika. Þetta sé eins stór liður í umhverfisstefnu fyrirtækisins en bæði Blush og Bókasafn Kópavogs styðja við heimsmarkmið Sameinuðu þjóðanna og starfa með samfélagsábyrgð og sjálfbærni að leiðarljósi.
Bókasafn Kópavogs hefur einnig verið framarlega í tækninýjungum og framþróun og með þessu samstarfi er stefnt að endurnýtanlegri og grænni framtíð.
Tekin var ákvörðun að bjóða upp á Reset vörulínuna til útláns en um er að ræða kynlífstæki hönnuð af Gerði sjálfri. Línan er framleidd hjá vottuðum verksmiðjum og inniheldur mun minna af óumhverfisvænum efnum en sambærileg tæki. Einnig verður hægt að fá spilin Forleik og Sambönd til útláns.
