Breski leikarinn Stephen Graham og Ísland eru í aðalhlutverki í nýrri auglýsingu þýska íþróttavöruframleiðandans Adidas. Í auglýsingunni má sjá Graham heillast af fegurð íslenskrar náttúru vel skóaður í mörgum pörum úr Spezial línu Adidas.
Graham hittir Friðrik Þór Friðriksson leikstjóra og framleiðanda og tekur kaffibollaspjall við hann og einnig Hilmar Örn Hilmarsson tónskáld sem semur tónlist auglýsingarinnar.
Graham vakti fyrst athygli í mynd Guy Ritchie, Snatch, árið 2000. Hann hefur leikið bæði í kvikmyndum og sjónvarpsþáttum og á meðal nýjustu verka hans eru kvikmyndirnar Boiling Point og Roald Dahl Matilda the Musical og þættirnir The Walk-In. Graham var tilnefndur til BAFTA-verðlauna í fyrra fyrir leik sinn í Boiling Point.
