Nokkrir gestir skemmtigarðsins Wonderland í Ontario-fylki í Kanada lentu illa í því um helgina þegar eitt tækið, sem nefnist Lumberjack, bilaði í miðri ferð með þeim afleiðingum að það stöðvaðist þegar allir farþegarnir héngu á hvolfi. Alls þurftu gestirnir að dúsa í slíkri stöðu í tæpan hálftíma.

Eins og gefur að skilja var um hryllilega reynslu að ræða fyrir fólki sem öskraði, grét og jafnvel ældi á meðan rauninni stóð. CBS-fréttastofan greindi frá atvikinu og birti myndband af samfélagsmiðlum. Fyrst um sinn voru farþegarnir rólegir og héldu að stoppið væri hluti af skemmtiferðinni en segja má að ofsahræðsla hafi gripið um sig meðal farþeganna föstu þegar sjúkrabifreiðar mættu skyndilega á vettvang. Virtust farþegarnir þá átta sig á að eitthvað verulega mikið væri að og jafnvel væri tímaspursmál þangað til farþegarnir færu að falla til jarðar.

Að endingu tókst að laga tækið en farþegarnir ráku aftur upp öskur og vein þegar tækið fór fleiri hringi enda gátu viðgerðarmennirnir ekki gert annað en að láta ferðina klárast.

Í umfjöllun CBS kom fram að nokkrir farþegar voru orðnir tilfinningalausir í fótleggjum og þá kvörtuðu einhverjir undan brjóstverkjum eftir að þeir höfðu losnað úr prísundinni. Enginn virðist þó hafa orðið fyrir alvarlegum meiðslum en sumir farþegar fara væntanlega ekki í skemmtigarð í bráð.