Ásdís Birna er 26 ára móðir, kærasta, háskólanemi og vinnur bæði á leikskóla og i málefnum heimilislausra í Reykjavík. Hún er nýjasti viðmælandi hlaðvarpsins Sterk saman.
Ásdís þekkir það á eigin skinni að vera heimilislaus en fyrir sjö árum var hún sjálf á þeim stað auk þess sem hún glímdi við þungan vímuefnavanda.
„Ég er ein af þessum skilnaðarbörnum, ólst upp á tveimur heimilum, var greind með ADHD og mótþróaþrjóskuröskun þegar ég var átta ára svo ég var fyrirferðamikil sem barn“, segir hún og bætir við að hvatvísin hafi oft bitið hana í rassinn í gegnum tíðina.
Fangelsisdómurinn áfall
Þegar Ásdís var nýfermd fékk pabbi hennar átta ára fangelsisdóm sem var mikið áfall fyrir alla.
Hún segir: „Ég heyrði það í fréttum að dómurinn væri fallinn og það greip mig ekkert. Mamma var auðvitað líka í sjokki og þetta var í öllum fjölmiðlum. Það er ekkert sem heldur utan um börn fanga en það er eitthvað sem ég verð ennþá reið yfir í dag.‟
Börn fanga á Íslandi fá enga aðstoð. Nýlega gaf umboðsmaður barna út skýrslu þess efnis að við stöndum mun aftar en hin Norðurlöndin þegar kemur að málefnum barna fanga, að öllu leyti. Ásdís talar um hvað það er sem vantar upp á hér á landi þegar kemur að börnum fólks sem fer í fangelsi. Það eru ekki einu sinni skráð hvort fangi eigi barn eða börn yfir höfuð og hefur aldrei verið gert.
Saklaus en samsekur
„Allt í einu var maður samsekur í einhverju sem maður hafði í raun ekkert að gera með‟ Börnunum er refsað fyrir það sem foreldrar þeirra gera og fá oft að finna fyrir því félagslega.
Eftir að Ásdís fór að fikta með vímuefni þróaðist neyslan hratt og var hún komin á götuna um hálfu ári síðar. Aðeins 18 ára fór hún í fyrsta skipti á Vog.
„Á Vogi kynntist ég fólki sem var komið miklu lengra í neyslu heldur en ég og fór auðvitað að hanga með þeim eftir að ég kom út. Ég held það sé ekkert gott fyrir krakka sem eru nýbyrjaðir í neyslu að fara á svona stað og kynnast fólki sem er komið miklu lengra.‟.
Neyslan jókst og breyttist. Ásdís þurfti að nýta sér þjónustu Frú Ragnheiðar og hefur þess vegna ákveðið að hlaupa í Reykjavíkurmaraþoninu og styrkja það góða starf.
Það má hlusta á viðtalið við Ásdísi í heild sinni á hlaðvarpinu Sterk saman.
