Ofurfyrirsætan og Íslandsvinkonan Irina Shayk mun hafa gert hosur sínar grænar með umfangsmiklum hætti fyrir Tom Brady. Bæði voru þau gestir í brúðkaupi erfingja listaverkaauðs Nahmad fjölskyldunnar, Joe Nahmad og fyrirsætunnar Madison Headrick sem fram fór síðustu helgi. Fjöldi A-lista boðsgesta var mikill og mátti sjá þar leikarann Leonardo DiCaprio og tennisstjörnurnar Serena og Venus Williams. Brúðkaupið var haldið á ítölsku eyjunni Sardiníu.
„Hún elti hann alla helgina. Hún gjörsamlega fleygði sér á hann,“ sagði heimildamaður við PageSix. Mun framferði hennar hafa vakið mikla athygli og umtal meðal brúðkaupsgesta, en brúðkaupið og veislan voru ansi vegleg og líklega um að ræða eitt stærsta og dýrasta brúðkaup ársins. Shayk uppskar þó ekki erindi sem erfiði, þar sem Brady tjáði félögum sínum að hann hefði ekki rómantískan áhuga á fyrirsætunni, sem meðal annars er þekkt sem ein af englum undirfatarisans Victoria´s Secret.
Brady skildi í október við eiginkonu sína til 13 ára, fyrirsætuna Gisele Bündchen. Eiga þau saman 13 ára son og tíu ára dóttur, Brady á einnig 15 ára son frá fyrra sambandi.
Shayk skildi fyrir fjórum árum við leikarann Bradley Cooper, eiga þau saman sex ára dóttur. Síðan þá hefur hún meðal annars verið orðuð við rapparann Kanye West.
Shayk hlaut stimpilinn Íslandsvinkona árið 2019, þegar hún hingað til lands eftir skilnaðínn við Cooper. Tilefnið var tökur fyrir herferð ítalska tískufyrirtækið Falconeri.
„Eyddi ótrúlegum augnablikum í tökum fyrir herferð @falconeriofficial á Íslandi. Myndataka sem ég mun aldrei gleyma,“ skrifaði hún við myndir sem hún deildi á Instagram af því tilefni.