Laura Amherst er 31 ára stjórnmálafræðinemi sem hefur orðið nokkuð þekkt í kjölfar mikillar umfjöllunar breskra fjölmiðla um hana. Ástæða þess að fjölmiðlar þar í landi hafa reglulega fjallað um Amherst er sú að hún mætir reglulega á loftlagsmótmæli í Bretlandi og er oftar en ekki ber að ofan á meðan hún mótmælir.

Amherst er hluti af hópnum Extinction Rebellion sem hefur haldið áberandi mótmæli í Bretlandi síðustu vikur, mótmælin ganga oft lengra en önnur mótmæli í sama málaflokki. Hópurinn er þekktur fyrir borgaralega óhlýðni sína á mótmælum en tekur skýrt fram að hann er á móti ofbeldi af öllu tagi.

Nú hefur Amherst tilkynnt að hún ætlar sér að sigla á ný mið en hún sækist nú eftir því að fá að taka þátt í Love Island þáttunum vinsælu. Hún hætti nýlega í sambandi og ákvað því að slá tvær flugur í einu höggi með því að sækja um að vera með í Love Island, hún ætlar sér að finna ástina og fræða fólk um loftlagsmál í leiðinni.

Í samtali við Daily Star segir Amherst að hún hafi ákveðið að sækja um í þáttunum því hún er með aðra sýn á heiminn heldur en fyrri þáttakendur. Hún nefnir sértaklega fyrrum Love-Island þáttakandann Molly-Mae Hague en hún er í dag stjórnandi sköpunar  (e. creative director) hjá fataversluninni Pretty Little Thing.

Amherst er á móti verslunum eins og Pretty Little Thing sem selja fatnað sem flokka má sem svokallaða skynditísku (e. fast fashion). Hörðustu aktívistar í loftlagsmálum eru virkilega á móti skynditísku og er Amherst í þeim hópi.

„Ég hugsaði um að fara í Love Island til að vekja athygli á loftlagsvandanum. Ég er búin að sækja um að vera með og ég vona að ég finni ástina og nái að vekja meiri athygli á þessu á sama tíma. Ég er ekki ennþá búin að fá svar en mér líður eins og þau vilji ekki fá mig þar sem ég gæti verið of umdeild.“