Í gær horfðu landsmenn um allt land á Áramótaskaupið að venju. Sitt sýnist hverjum um Skaupið ár hvert. Sumir ná vart andanum af hlátri á meðan aðrir ná ekki upp í nef sér af hneykslun yfir því að skattpeningunum okkar sé varið með þessum hætti.

Umræður á kaffistofum landsins á nýju ári varða oftar en ekki Skaupið, en svo virðist sem hver og einn Íslendingur hafi sterka skoðun á því, hvort sem hann sé ánægður eða fúll með það. Því ákvað DV að gera skoðanakönnun í morgun til að sjá hvernig landanum fannst það.

Niðurstöður könnunarinnar voru ekki jákvæðar fyrir höfunda skaupsins að þessu sinni. Rúmlega 56 prósent svarenda sögðu Skaupið annaðhvort frekar lélegt, eða gengu svo langt að segja það versta skaup sem það hefði séð.

Á meðan sögðu einungis 25 prósent Áramótaskaupið vera gott, og minna en tvö prósent vildu meina að þetta hafi verið besta skaup allra tíma. Þá sögðu um það bil 17 prósent að Skaupið hefði sloppið fyrir horn.

Niðurstöðurnar voru þessar:

Besta skaup allra tíma! – (1.59%)

Gott skaup – (25.06%)

Slapp fyrir horn – (17.35%)

Frekar lélegt – (36.20%)

Versta skaup sem ég hef séð – (20.09%)

Þetta virðist vera ansi ólíkt því sem var uppi á teningnum í fyrra, en samkvæmt könnun sem MMR gerði um Skaupið 2020, voru 85 prósent sáttir. Þar af töldu 64 prósent það mjög gott og 21 prósent sögðu það frekar gott.

Höfundar Skaupsins í ár voru þau Bergur Ebbi, Gagga Jónsdóttir, Hugleikur Dagsson, Katla Margrét Þorgeirsdóttir, Lóa Hjálmtýsdóttir og Vilhelm Neto og með leikstjórn fór Reynir Lyngdal, en það er að miklu leiti sama teymi og í fyrra.