Förðunarmeistarinn Sigurlaug Dröfn Bjarnadóttir, stofnandi og eigandi Reykjavik Makeup School, hélt upp á 40 ára afmælið sitt með pompi og prakt á heimili sínu í gær. Í myndböndum sem Sigurlaug birti á Instagram-síðu sinni í gær má sjá að veislan var alveg rosaleg, gestum var til að mynda boðið upp á hlaðborð af dýrindis kræsingum, kokteila sem barþjónar Reykjavik Cocktails gerðu á staðnum og Stjórnin mætti þegar leið á kvöldið og tryllti lýðinn.
Þá voru gestirnir í veislunni alls ekki af verri endanum. Í færslum sem birtust á Instagram í gær mátti sjá fjölmarga úr þotuliði áhrifavalda í veislunni. Má þar til að mynda nefna stjörnuparið Línu Birgittu Sigurðardóttir og Guðmund Birki Pálsson, eða Gumma Kíró eins og hann er gjarnan kallaður. Lína og Gummi nýttu sér myndavegginn í veislunni og Gummi deildi afrakstrinum á Instagram-síðu sína um leið.
View this post on Instagram
Birgitta Líf Björnsdóttir, áhrifavaldur og athafnakona, lét sig að sjálfsögðu ekki vanta í veisluna þrátt fyrir að vera nýlent frá Parísreisu sinni Birgitta hefur nú endurheimt Instagram-aðganginn sinn eftir að hakkarinn alræmdi tók hann niður, svo hún gat sýnt frá því sem fram fór í veislunni á sinni Instagram-síðu líka. Hún skemmti sér til dæmis með atvinnumanninum Herði Björgvini Magnússyni en þau tóku undir með Siggu Beinteins þegar hún söng slagarann Vertu ekki að plata mig.
Foreldrar Birgittu, World Class-hjónin Björn Leifsson og Hafdís Jónsdóttir, mættu einnig í veisluna. Líkt og flestir aðrir gestir veislunnar þá tóku þau mynd af sér við myndavegginn fallega.
Sólrún Diego var að sjálfsögðu á staðnum í gær. Þrifdrottningin var ekki vopnuð edikbrúsanum í veislunni enda var veislan alveg upp á 10. Allt var stútfullt af blöðrum en fyrirtækið Balún setti blöðrurnar upp. „Mestu snillingar í heimi,“ segir Silla um fólkið í Balún. Eins og vinkona Sillu orðaði það í gær þá fór hún alla leið eins og hún gerir yfirleitt þegar hún tekur sér eitthvað fyrir hendur. „Silla er ekki þekkt fyrir neitt annað en að fara all in.“
Hér fyrir neðan má sjá nokkrar myndir sem Silla deildi á Instagram-síðu sína úr veislunni en þær sýna hvernig veislan leit út. Eins og sjá má eru blöðrurnar frá Balún í aðalhlutverki. Þá má einnig sjá myndavegginn vinsæla en gestir veislunnar voru afar duglegir að nýta sér hann.
