Alex Michael Green, ljósmyndari og efnishöfundur (e. content creator), kom á dögunum með kenningu um Instagram-hakkarann alræmda. Alex taldi að um einhvers konar markaðsherferð væri að ræða, verið væri að loka öllum þessum aðgöngum til að koma síðan með auglýsingu fyrir netöryggi eða eitthvað slíkt. Þessi kenning hans fór ekki vel í hakkarann sem ákvað að hefna sín og hakka aðganginn hans Alex á Instagram. „Heldurðu ennþá að ég sé ekki ekta?“ spurði hakkarinn í færslu sem hann birti á Instagram þar sem hann sýndi að búið væri að loka aðganginum hans Alex.

Í samtali við DV segist Alex ekki hafa miklar áhyggjur af þessu. „Ég er content creator, ég hætti ekkert að búa til efni þó svo að Instagram-aðgangurinn minn liggji niðri. Það er ekki eins og ég missi hæfileikann minn til að taka myndir og myndbönd,“ segir hann en mínusinn við þetta er aðallega vesenið sem fylgir því að missa aðganginn. „Ég vona að þetta lagist, ég nota þetta sem aðal samskiptamiðil, ég þyrfti að ná sambandi aftur við svo marga og stofna fullt af spjallhópum aftur, ég nenni bara ekki veseninu.“

Alex finnst þetta í rauninni vera bara nokkuð fyndið, það að hakkarinn hafi ákveðið að hakka sig eftir að hann kom með kenninguna sína. Þá finnst honum það vera áhugavert að þetta sé alvöru hakkari en ekki bara einhver markaðsherferð. „Þetta er ótrúlega impressive, ég hef aldrei séð neinn koma hingað og gera neitt svona áður. Ég tek hattinn ofan fyrir honum,“ segir Alex um hakkarann.

Mikill fjöldi af íslenskum áhrifavöldum hefur orðið fyrir barðinu á hakkaranum. „Þetta er samt leiðinlegt fyrir hitt fólkið sem reiðir sig ótrúlega mikið á samfélagsmiðilinn því þaðan koma tekjurnar þeirra,“ segir Alex. „Mér finnst þetta bara fyndið en ég held að hinum finnist þetta ekkert sérstaklega fyndið. Þetta er ruglað, þetta er alveg snarruglað.“