Einn frægasti hundur Íslands er að öllum líkindum Samson, eini klónaði hundur landsins svo vitað sé. Samson er í eigu forsetahjónanna fyrrverandi, Ólafs Ragnars Grímssonar og Dorritar Moussaieff, en eins og frægt varð var Samson klónaður úr erfðamengi Sáms, eldri hundi hjónanna sem var þeim afar kær. Málið vakti gríðarlega athygli á sínum tíma en þó að verðið hafi aldrei verið staðfest fjölluðu innlendir fjölmiðlar um að verðmiði á slíku kraftaverki væri um sex milljónir króna. En þó að Samson blessaður sé frægasti og líklega dýrasti hundur landsins þá er hann á engan hátt fullkominn.
Dorrit birti í kvöld myndband á Instagram-síðu sinni þar sem sjá má Samson busla í vatni og horfa löngunaraugum á hóp gæsa sem að synda í hnapp lengra úti á vatninu. Milljónahvuttinn gerir þó enga tilraun til þess að synda í átt að gæsunum, þó að það sé bersýnilega það sem hann langar, heldur veður hann í ráðalaus í hringi þar sem hann nær til botns. Hann kann einfaldlega ekki að synda.
Dorrit hefur greinilega nokkrar áhyggjur af stöðu mála því að á Instagram síðu sinni spyr hún fylgjendur sína hvort þeir kunni einhver ráð til þess að kenna hundi að synda. „Hann virðist ekki skilja af hverju gæsirnar geta verið á meira dýpi en hann,“ segir Dorrit.
Rétt er að geta þess að þó að flestar tegundir hunda kunni að synda þá eru sumar tegundir sem að eru ekki eins sleipar á því sviði en Samson er blanda af íslenskum fjárhundi og ónefndri þýskri tegund. Þá liggur ekki fyrir hvort að Sámur, faðir Samson, hafi kunnað að synda. Ef svo er þá er spurning hvort að Ólafur Ragnar og Dorrit hafi keypt hundinn í sekknum.