Brynjar Níelsson, fyrrverandi þingmaður og lögmaður, er sjálftitlaður fýlupúki í fýlupúkafélaginu og vísar iðulega til þess í pistlaskrifum sínum á Facebook. Það vekur því kannski eftirtekt margra að sjá Brynjar í jólapeysu á forsíðu jólablaðs Morgunblaðsins sem var dreift í aldreifingu í dag.

Þar má finna kostulegt viðtal við Brynjar þar sem hann greinir frá jólahefðum sínum, eða skort á slíkum, en þessi jólin ætlar hann að setja heilsuna í forgang.

„Það má hvað úr hverju kalla mig vaxtarræktartröll. Ég stefni á að taka þátt í Íslandsmótinu í fitness og síðan keppa í Sterkasta manni heims næsta sumar. Því mun ég ekki slá slöku við um jólin og æfa upp á hvern dag. Í kringum svona heilsuátak er gjörbreytt mataræði. Ég hef að vísu ekki smakkað áfengi eftir rafskútuslysið fræga og reikna ekki með að ég drekki áfengi í framtíðinni. Nú borða ég bara hollan mat og prótínríkan með dassi af sterum.“

Hann segir að jólamaturinn hans í ár verði í takt við ofangreint markmið.

„Jólamaturinn hjá mér verður þetta árið sex egg með fæðubótardrykkjum.“

Brynjar segist ekki strengja áramótaheit en hann voni þó að honum muni líða vel á næsta ári og svo að einhver hafi áhuga á að fá hann í vinnu.

Kostulegt viðtalið við Brynjar má lesa í heild í jólablaði Morgunblaðsins en þar fer Brynjar meðal annars yfir bernskuótta sinn við jólasveinana og þegar hann forðaði sér á hlaupum fimm ára gamall undan einum slíkum sveini.

Eins og sjá má hér að neðan hefur þó val Morgunblaðsins á forsíðufyrirsætu jólablaðsins vakið nokkra athygli.

Þetta er það ógnvænlegasta sem ég hef séð https://t.co/2UJKKblM4I

— Þorsteinn Vilhjálmss (@kirjalax) November 25, 2021

Tvífarar dagsins. pic.twitter.com/wSZbsqGuWj

— Golli – Kjartan Þorbjörnsson (@gollmundur) November 25, 2021

Gleðileg jól🤶🏻 – Nú mega jólin koma 🎄 pic.twitter.com/9lXFn12PHn

— Vilhjálmur Árnason (@VilliArna) November 25, 2021