Karl Pétur Jónsson, bæjarfulltrúi Viðreisnar á Seltjarnarnesi, mætti í góðum gír út á Keflavíkurflugvöll í gærmorgun ásamt dóttur sinnu. Förinni var heitið í langþráða fermingarferð til Napólí þar sem njóta átti lífsins í átta daga. Eins og vænta mátti deildi bæjarfulltrúi tilhlökkun feðginanna með Facebook-vinum sínum í færslu á miðlinum.
„Planið var að fara vorið 2019, þá fór WOW á hausinn, vorið 2020 þurfti í annað sinn að fresta og í þriðja sinn frestuðum við í vor. En nú erum við á leið til Napolí í 8 daga. Í boði mömmu. Þetta er fermingargjöfin hennar til Kötlu eins og til allra barnabarnanna. Hún er með okkur í anda,“ skrifaði Karl Pétur og lét fylgja með mynd fyrir framan Leifsstöð.
Héldu eflaust flestir vinir og vandamenn að næsta færsla yrði úr sólinni við Napólíflóa og því urðu eflaust margir undrandi þegar bæjarfulltrúinn birti færslu á Twitter-síðu sinni úr vosbúðinni við Faxaflóa.
„Kominn til KEF með dóttur minni á leið í fermingarferð. Henti í spikfeitan FB status. Komst að því þegar um 120 manns voru búnin að óska okkur góðrar ferðar að flugið okkar til Napoli er á morgun. 14 ára dóttir mín er þolinmóðasta manneskja sem ég þekki,“ skrifaði bæjarfulltrúinn og hafði augljóslega mikinn húmor fyrir mistökum sínum.
Kominn til KEF með dóttur minni á leið í fermingarferð. Henti í spikfeitan FB status. Komst að því þegar um 120 manns voru búnin að óska okkur góðrar ferðar að flugið okkar til Napoli er á morgun. 14 ára dóttir mín er þolinmóðasta manneskja sem ég þekki.
— Karl Pfétur (@karlpetur) October 20, 2021
Ætla má að feðginin séu nú lögð af stað til Napólí í tilraun tvö og óskar Fókus þeim góðrar og ánægjulegrar ferðar.