Joe Biden tók nýverið við sem forseti Bandaríkjanna en eitt af því sem hefur vakið mikla athygli og jafnvel reiði er úrið sem hann notar.
Úrið sem um ræðir er frá hinum geysivinsæla en um leið dýra úraframleiðandanum Rolex. Samkvæmt News.com.au hefur úrið vakið reiði meðal almennra borgara í Bandaríkjunum þar sem það er bæði dýrt og ekki framleitt í Bandaríkjunum en úrið er framleitt í Sviss. Þá kostar úrið hvorki meira né minna en 905 þúsund í íslenskum krónum.
Biden er þó ekki fyrsti forseti Bandaríkjanna sem gengur um með úr frá Rolex. Hann fetar í fótspor þeirra Dwight Eisenhower, Lyndon B. Johnson og Ronald Reagan en þeir gengu allir um með úr frá Rolex.
Síðan Bill Clinton var forseti hafa forsetar Bandaríkjanna þó flestir notast við úr sem vekja ekki jafn mikla athygli. Clinton notaði til að mynda Timex Ironman úr en fékk þó fyrir það skammir frá The Washington Post. „Stafrænt úr úr plasti sem er þykkt eins og múrsteinn og jafn flott og kviðslit,“ skrifaði fjölmiðillinn um úrið hans Clinton á sínum tíma.
