Móðir var skelfingu lostin þegar hún sá að nýfætt barn sitt var með stóran skurð undir hægra auga. Barnið var tekið með keisaraskurði og á meðan aðgerðinni stóð skar læknir óvart barnið í leiðinni. The Sun greinir frá.

Rússneska móðirin Darya Kadochnikova, 19 ára, þurfti að fara í keisaraskurð eftir að barnið sneri sér við í móðurkviðnum. Þar sem mænurótardeyfing virkaði ekki á hana var hún svæfð.

Þegar hún vaknaði sá hún dóttur sína í fyrsta skipti og skurðinn á andliti hennar.

Samkvæmt rússneskum miðlum var Daryu sagt af heilbrigðisstarfsfólki að nýfædda dóttir hennar „hefði ekki átt að hreyfa sig svona mikið.“

Keisaraskurður er stór kviðarholsaðgerð þar sem gerður er skurður á kvið móður og barnið sótt inn í legið.