Ingibjörg Katrín Kristjánsdóttir, eða Inga Kristjáns eins og hún er alltaf kölluð, heldur úti glæpahlaðvarpinu Illverk. Hún hefur gefið út rúmlega 80 þætti sem hafa slegið í gegn. Í þáttunum fer Inga yfir líf þekktra morðingja og fórnarlamba þeirra. Kafar hún ofan í barnæsku þeirra og skoðar öll sjónarhorn málanna.
Áhugi fólks á hlaðvarpinu hefur verið gífurlegur og stofnaði Inga heimasíðuna illverk.is í maí. Á síðunni er hægt að kaupa áskrift þar sem fólk fær fleiri þætti í mánuði og aðgang að aukaefni.
„Ég bjó til Illverk vegna þess að ég hef mikinn áhuga á að skrifa og skapa. Ég hef reyndar líka bara ofsalega mikinn áhuga á öllu sem er óvenjulegt. Að vera með þættina hefur kennt mér svo mikið. Ég er til dæmis mjög lesblind og hef alltaf átt erfitt með upplestur en eftir að ég byrjaði með þættina er ég orðin mikið öruggari með mig og hef meiri trú á sjálfri mér. Ég er frekar félagsfælin týpa og vil alltaf gera alla glaða svo að vera með þætti sem 15-20 þúsund manns hlusta á í hverri viku er líka stór áskorun fyrir mig.“
Uppáhalds morðinginn Jeffrey Dahmer
Aðspurð hver „uppáhalds“ morðingi Ingu sé þarf hún ekki einu sinni að hugsa sig um „Það er hann Jeffrey Dahmer, hann er svo áhugaverður karakter á svo marga vegu. Hann var rosalega viðkunnanlegur einstaklingur að tala við og engum grunaði að hann væri þetta skrímsli sem hann var. Hann átti yndislegt samband við föður sinn og eftir að hann var handtekinn þá sat faðir hans með honum í öllum viðtölum og stóð við bakið á honum. Það er bara eitthvað við hann sem er ólíkt öðrum raðmorðingjum sem ég hef tekið fyrir.“
Jeffrey Dahmer var raðmorðingi sem var haldinn náhneigð og stundaði mannát. Dahmer myrti 17 unga menn á árunum 1978 til 1991 sem flestir voru af afrísku eða asísku bergi bergi brotnir.
Inga er hvergi nærri því hætt og ætlar að halda áfram að deila sögum þessara einstaklinga með hlustendum sínum. „Mér finnst líka svo mikilvægt að sögur fórnarlamba þessara einstaklinga sé sögð, að raddir þeirra heyrist.“ segir Inga.