Annie Howard missti föður sinn úr krabbameini í ágúst 2014. Ári seinna kynntist hún unnusta sínum, Will.
Annie var mjög náin föður sínum og var miður sín yfir því að faðir hennar hafi aldrei fengið tækifæri til að kynnast framtíðar eiginmanni hennar. En það breyttist þegar hún fann gamla mynd af sér, föður sínum og Will. Fabulous Digital greinir frá.
Annie og Will gengu í sama skóla í æsku, frá fjögurra ára til fimm ára aldurs. Síðan flutti Will og fór í annan skóla.
Móðir Annie var að skoða gamlar myndir þegar hún fann mynd af Annie, Will og föður Annie haldast í hendur.
„Mamma hringdi í mig og sagði: „Annie, þú átt aldrei eftir að giska hvað ég fann.“ Hún sendi mér mynd af pabba halda í höndina á mér og Will. Við vorum um fimm ára gömul. Ég tók þessu sem merki frá pabba að Will væri sá eini rétti,“ segir Annie.
„Pabbi hataði alla kærastana mína. Hann átti erfitt með að fela tilfinningar sínar, eins og ég, og þegar honum líkaði illa við einhvern þá var það augljóst. En ég veit að pabba og Will hefði komið vel saman. Þeir eru mjög líkir, þeir elska báðir tónlist og eru báðir með lögfræðigráðu.“
Annie segist velta því fyrir sér hvort að óvæntur fundur með Will hafi verið lokagjöf frá föður hennar.
Will fór á skeljarnar í nóvember síðastliðinn. „Hann bað mín á Blakeney ströndinni í Norfolk, þar sem pabbi eyddi sumrum sínum sem barn og þar sem ösku hans var dreift, þetta var einstök stund,“ segir Annie.
„Ég er svo spennt að giftast Will og ég veit að pabbi mun fagna með okkur í himnaríki.“