Ásdís segir eina vannýttustu auðlind umsækjenda vera fylgibréfið (e. cover letter).
„Ekki nota það til að súmmera ferilskrána! Aðlagaðu fylgibréfið að hverju fyrirtæki fyrir sig og talaðu um af hverju þú yrðir framúrskarandi í þessu tiltekna starfi. Já þetta er tímafrekara en staðlað bréf en MARG borgar sig.“
Hún kemur síðan með nokkrar leiðir til að sérsníða fylgibréfið fyrir hverja starfsumsókn.
„Segðu af hverju þig langar í þetta tiltekna starf. Er eitthvað í starfslýsingu sem kveikir sérstaklega í þér? Eitthvað varðandi fyrirtækið? Af hverju viltu frekar vera í þessu starfi en öðrum?“
Ásdís segir að umsækjendur ættu ekki að tala um fyrirtækið né þylja upp staðreyndir sem stjórnandinn veit nú þegar.
„Útskýrðu frekar hvað það er við fyrirtækið sem höfðar sérstaklega til þín. Til dæmis að nefna áhuga á orkumálum/rafbílum þegar þú sækir um starf í þjónustuveri orkufyrirtækis gerir þig strax áhugaverðari en meðal-umsækjanda sem er að leita sér að starfi í hvaða þjónustuveri sem er. Mundu að vinnuveitendur vilja umsækjanda sem er spenntur fyrir þessu tiltekna starfi, ekki bara hvaða starfi sem er. Segðu fyrirtækinu/þeim sem les af hverju þau ættu líka að vilja þig, og vertu nákvæm(ur)“
Hún segir fylgibréfið vera rétta staðinn til að segja frá því ef það er eitthvað fyrir utan menntun eða starfsreynslu sem gerir umsækjandann sérstaklega vel til fallinn í starfið.
„Kannski krefst starfið mikillar vandvirkni og það er alltaf verið að stríða þér með hvað þú ert nákvæm(ur) og sjúklega vandvirk(ur). Glæsilegt! Segðu frá því í bréfinu, annars veit lesandinn það ekki. Annað, ef þú veist að þú ert „overqualified“ í starfið en langar samt í það – nefndu það í bréfinu, annars heldur lesandinn að þú áttir þig ekki á eðli starfsins og ákveður að eyða hvorki sínum tíma né þínum á að boða þig í viðtal.“
Umsækjendur ættu að taka það fram í fylgibréfinu ef þeir uppfylla ekki allar hæfniskröfurnar. Síðan er gott að segja frá því af hverju þeir yrðu frábærir í starfinu þrátt fyrir það.
„Ekki vonast til að enginn taki eftir því að vantar uppá hæfni.“
Samkvæmt Ásdísi þá verða umsækjendur að passa sig á því að nota þessa línu í fylgibréfinu.
„Ekki nota línuna „Þú finnur ekki hæfari manneskju en mig!“ því það er sjaldnast satt og virkar pínu einfeldningslega.“
Fylgibréf geta verið tímafrek og þá sérstaklega þegar þau eru sérsniðin að hverju fyrirtæki fyrir sig.
„Stundum fæ ég að heyra að fólk hafi engan tíma í að sérsníða fylgibréf þegar það er í virkri atvinnuleit og að sækja um mörg störf. Sæktu þá um færri störf. Ég get LOFAÐ því að fimm persónuleg, vel sniðin bréf skila meiri árangri en 30 staðlaðar umsóknir. Áfram þú!“
