Margrét Erla Maack er að fara af stað með veislustjóranámskeið. Ekki eru allir spenntir fyrir því en Sverrir Ólafsson viðraði sína skoðun á Margréti Erlu á Facebook. Hins vegar hefur gagnrýni Sverris ekki haft neikvæð áhrif því sala á námskeiðinu hefur rokið upp í kjölfarið að sögn Margrétar Erlu.

Sverrir skrifaði:

„Ég hef verið í samkvæmi þar sem þessi Margrét var veislustjóri og það var alveg hroðalega ófyndið og ófagmannlegt allt saman. Algjört klúður og rugl. Er hún svo að fara að kenna öðrum veislustjórnun?! Það er sennilega hennar eini fyndni brandari.“

Margrét Erla birtir skjáskot af gagnrýninni frá Sverri og skrifar með því:

„Sverrir Ólafsson mælir alls ekki með Veislustjóranámskeið með Margréti Maack. Annars langar mig að þakka Sverri, því eftir að hann skrifaði þetta virðist salan á námskeiðin hafa rokið upp,“ segir Margrét Erla og bætir við:

„Partý eru nú bara þannig að þau geta ekki verið skemmtilegri en fólkið sem er í þeim.“

Ein skrifar við myndina hjá Margréti að líklegast sé um gervi-Facebook aðgang að ræða „sem gerir þetta ennþá fyndnara.“

Margrét Erla svarar henni: „Ég bara dýrka þetta. Langbesta auglýsing sem ég hef fengið. ATH ég er ekki á bakvið þennan gervi aðgang sjálf.“

Við nánari athugun á Facebook síðu Sverris er það að öllum líkindum rétt að ekki sé hann að koma fram undir réttu nafni né mynd.