Sönghópurinn Lyrika var að gefa út svokallaða syrpu fyrir jólin. Sigrún Ósk Jóhannesdóttir, einn meðlimur hópsins, segir frá hvernig Lyrika varð til og hver hugmyndin var á bak við jólasyrpuna.

„Sönghópurinn okkar, Lyrika, er acapella kvartett – sem þýðir að við syngjum án undirleiks. Við kynntumst fyrst sem unglingsstelpur í kórastarfinu í Langholtskirkju, en stofnuðum síðar sönghópinn í tengslum við söngvakeppnina Óðrík Algaula, þegar hluti af okkur var í MH. Það vatt síðan heldur betur uppá sig og höfum við komið fram á alls konar viðburðum síðan, t.a.m. árshátíðum, ráðstefnum og stórum og smáum einkasamkvæmum,“ segir Sigrún Ósk.

„Við leggjum mikla áherslu á að vera frumlegar í því sem við erum að gera og stór liður í því er að gera eigin útsetningar. Acapella formið gefur okkur svolítið frelsi til að skeyta saman lögum og melodíum og þess vegna er svo gaman fyrir okkur að gera syrpur og fléttur.“

Lyrika var að gefa út skemmtilega jólasyrpu sem má horfa á hér að neðan.

„Hugmyndin á bak við jólasyrpuna okkar er í rauninni sú að í desember hafa margir jólaútvarpsstöðvarnar í gangi í bílnum eða við jólaundirbúninginn heima. Oftast eru það sömu lögin sem eru endurtekin aftur og aftur og fólk fær þau á heilann. Ein okkar ákvað að velja nokkur góð og setti saman í þessa skemmtilegu syrpu fyrir fólk til að njóta,“ segir Sigrún Ósk.