Nú er orðið ansi stutt í jólin og þeim fylgja einlægar og fallegar gjafir frá okkar nánustu. DV ákvað að leita til nokkurra þekktra Íslendinga og spyrja þá hverjar eftirminnilegustu jólagjafirnar væru. Við gefum Hallgrími Ólafssyni, leikara, eða Halla eins og hann er oftast kallaður, orðið, en fleiri frásagnir af eftirminnilegum gjöfum má lesa í nýjasta helgarblaði DV.
„Jólin 1988. Eftir jólasteikina kallar mamma á mig og biður mig að koma með sér inn í herbergi af því hún ætli að segja mér svolítið. Hún sest rólega á rúmið og ég verð alveg brjálaður og segi: „Ég veit alveg hvað þú ert að fara að segja mér.“ Mamma skildi ekki neitt og ég hélt áfram: „Heldurðu að ég viti það ekki, þú ert ólétt eina ferðina enn. Á að eyðileggja fyrir manni jólin?“ Ég hafði nefnilega eignast systkini tvö ár í röð 1987 og 1988. Mamma gjörsamlega sturlaðist úr hlátri yfir öskrunum í mér og kom ekki upp orði. En hún kallaði mig inn í herbergi svo pabbi gæti komið jólagjöfinni minni fyrir undir trénu en það var risa hljómborð sem mig hafði dreymt um.“
Lestu allt um eftirminnilegar gjafir í nýjasta DV.