Karlmenn hafa verið hvattir til að mæta á sérstaka sýningu kvikmyndarinnar Frozen II, sem fram fer í Sambíóunum Álfabakka annað kvöld.
Það eru bræðurnir Bjarki og Fannar Sigurðssynir sem standa fyrir sýningunni en hátt í 200 manns segjast ætla að mæta og enn fleiri sína áhuga á viðburðar-síðu sýningarinnar á Facebook.
Blaðamaður DV ræddi við Bjarka, en hann segist alfarið eiga hugmyndina að sýningunni, sem hann segir algjörlega ópólítíska.
„Mig langaði að sjá þessa mynd og ég tékkaði á bróður mínum, hvort að honum langaði ekki með, og hann var til. Við sendum svo á fleiri stráka og spurðum hvort að þeim langaði ekki með og þeir sögðu að þeim langaði, en fannst það eitthvað skrýtið.“
„Þeim fannst eitthvað skrýtið að fara fullorðnir karlmenn á barnamynd, þannig að ég hugsaði út í það hvernig hægt væri að normalisera það að fara á svona mynd, sem karlmaður.“
Bjarki tekur fram að þetta sé eina karla-sýningin á Frozen II sem hann muni standa fyrir, en hann segir að þetta sé kjörið tækifæri fyrir karlmenn að sjá myndina, þar sem að þarna dæmi enginn.
Hann heldur því þó til haga að engum verði meinaður aðgangur að þessari sýningu og að öllum sé velkomið að mæta, enda sé þetta í rauninni bara venjuleg bíósýning sem þeir ætli á.
Bjarki viðurkennir þó að hann óttist að mætingin gæti orðið döpur og hvetur hann því fólk, þá sérstaklega karlmenn að láta sjá sig á morgun.
„Þetta á ekki að vera pólitískt, heldur er markmiðið að hafa gaman.“
Að lokum segist Bjarki vera opin fyrir því að bíógestir mæti í búningum, til þess að fagna fjölbreytileikanum, þó það sé ekki nema hárkolla.
Hér getur þú nálgast Facebook-viðburðinn fyrir karlasýninguna á Frozen II.