Rapparinn umdeildi Birgir Hákon sagði í viðtali í Íslandi í dag, í kvöld að hann væri hættur í neyslu.

Tónlist Birgis hefur aðallega snúist um líf í undirheimum Reykjavíkur, en fíkniefni, byssur, ofbeldi og deilur við lögregluna eru algeng umfjöllunarefni í lögum hans.

Birgir segist hafa byrjað ungur að fikta við fíkniefni og verið byrjaður að selja þau þegar hann var 16 til 17 ára.

„Ég lenti mikið í útistöðum við lögregluna ungur, mér fannst lögin ekki alltaf eiga við um mig,“

Þegar fréttamaður spyr Birgi hvort hann hafi verið alræmdur svarar hann játandi, hann viðurkennir að hann hafi beitt grófu ofbeldi.

Hann segist bæði hafa lent í því að skotið væri í átt að sér og í hnífsárás.

„Ég ætlaði ekkert að verða svona, það vill engin verða ofbeldismaður, eða ógæfumaður.“

Birgir talar þó um að lífsstíll hans hafi veit honum mikinn pening, en hann fullyrðir að hafa átt tíu milljónir í seðlum einungis tvítugur að aldri.

Birgir segir hann hafi þurft að breyta um lífsstíl þegar að móðir hans greindist með mjög alvarlegt krabbamein, en Birgir segist ekki hafa getað heimsótt hana á spítala vegna neyslu sinnar.

Birgir segist nú vera búin að vera edrú í meira en ár. Hann segir að rapparinn Herra Hnetusmjör hafi hjálpað sér mikið í því að snúa við blaðinu, þó að Birgir hafi upprunalega verið ósáttur með að Herra Hnetusmjör skyldi verða edrú.

Birgir segir að erfitt hafi verið að slita á tengsl við suma einstaklinga, þó að heilt yfir lýði honum betur í dag.

„Ég þarf ekki að pæla hvort að ég sé eftirlýstur eða eitthvað,“