Áhöfnin á TF-GRO, þyrlu Landhelgisgæslunnar, kom bangsanum Blæ til bjargar og fluttu hann á leikskólann Laut í Grindavík. Á leikskólanum biðu hans leikskólabörn sem voru búin að fræðast um raunir Blæs en hann lenti í háska á leið sinni til Grindavíkur frá Ástralíu.
„Um er að ræða verkefni sem Barnaheill stendur fyrir en bangsanum er ætlað að kenna börnunum vináttu og virðingu. Það var ekki annað að sjá en að leikskólabörnin og starfsmenn leikskólans væru himinlifandi með heimsóknina. Blær fékk plástur hjá áhöfninni á leiðinni og hlaut höfðinglegar móttökur við komuna til Grindavíkur.“
Áhöfnin á þyrlunni bar bangsann á börum inn á leikskólalóðina en þá fengu börnin að skoða þyrluna og búnaðinn í henni áður en hún flaug aftur til Reykjavíkur. Í áhöfn þyrlunnar voru þeir Walter Ehrat, flugstjóri, Andri Jóhannesson, flugmaður, Magnús Pálmar Jónsson, sigmaður og Tómas Vilhjálmsson, spilmaður.
Facebook færslu Landhelgisgæslunnar má sjá í heild sinni hér fyrir neðan ásamt myndum frá verkefninu.
https://www.facebook.com/permalink.php?story_fbid=2844634665558015&id=377056962315810
