Guðlaugur Auðunn Falk, gítarleikari og tónlistarmaður, lést 29. júní 2017 eftir erfiða baráttu við krabbamein, hann var 57 ára. Gulli var þekktur gítarleikari og lagahöfundur og hafði starfað með fjölda tónlistarmanna um árabil.

Gulli hafði unnið að diskinum Kaffi Ole fyrir andlát sitt og var það hans hinsta ósk að diskurinn yrði kláraður og gefinn út eftir andlát hans. Og nú er diskurinn orðinn að veruleika, hann inniheldur 13 lög eftir Gulla með textum Gísla Brynjars.

„Geggjað efni og með því betra sem pabbi hefur samið, blanda af blúsrokki og melódískum lögum þar sem kassagítarinn nýtur sín. Plata sem hann vann að fram á síðustu stundu, hans eina ósk var að platan yrði gefin út. Við erum öll mjög stolt af afrekinu og ég veit að það er hann líka,“ segir Árni Hrafn Falk, sonur Gulla.

Að disknum kemur fjöldinn allur af tónlistarmönnum, listamönnum og fleirum. „Við ættingjar Gulla viljum þakka þeim fyrir þeirra framlag til að gera diskinn að veruleika,“ segir Árni Hrafn, en diskinn má kaupa hjá honum.