Þessa daga heillar hún sjónvarpsáhorfendur ásamt dansfélaga sínum, Bergþóri Pálssyni, í Allir geta dansað á Stöð 2.
DV heyrði í föður Hönnu, gullsmiðnum Óla, sem stutt hefur dóttur sína alla tíð á dansferlinum og spurði: Hvað segir pabbi um dótturina?
„Það er margt hægt að segja um Hönnu Rún, en í æsku var hún ótrúlega mikill orkubolti og uppátækjasöm, sem féll misvel í kramið hjá okkur foreldrunum. Það er ekki hægt að tala um Hönnu Rún án þess að minnast á dansinn, því hann hefur átt hug hennar, alla tíð síðan hún byrjaði að dansa fjögurra ára gömul. Hanna Rún er hjartahlý og góð stelpa, með ótrúlega góða nærveru, sem vill öllum vel. Hennar stærsti galli, er kannski sá að henni er næstum ómögulegt að segja nei, og það bitnar alltaf mest á henni sjálfri. Hún er mikil keppnismanneskja, og ótrúlega fjölhæf. Hún er mjög flink að teikna, yrkir ljóð, gerir teiknimyndasögur, spilar á píanó, syngur, saumar og hannar alls konar föt, fyrir sig og aðra. Hún er súper pabbastelpa.“