Kærasti vaxtaræktarkonunnar Söru Heimisdóttur, vöðvafjallið Chris Miller, var hætt kominn eftir hjartaáfall á mánudag. Sara og Miller hafa verið saman í tvö ár og eru búsett í Bandaríkjunum.
Sara segir að hjartaloka Chris hafi nánast verið stífluð til fulls og er ljóst að illa hefði getað farið.
„Ég var mínútum frá því að missa hann. Honum líður betur núna eftir að hafa gengist undir aðgerð og ég er svo stolt af mínum manni,“ segir Sara á Instagram-síðu sinni. „Ég elska þig af öllu hjarta.“
Sara birtir mynd af sér við hlið Chris þar sem hann liggur í sjúkrarúmi. Í færslu sinni tekur Sara það sérstaklega fram að ekki sé hægt að kenna sterum um, þó að áralöng þjálfun Chris í vaxta- og líkamsrækt hafi tekið sinn toll af honum. „Læknar telja að um hjartagalla sé að ræða.“
Sara hefur vakið talsverða athygli á undanförnum árum en hún var eitt sinn eiginkona líkamsræktarmannsins Rich Piana. Lífsstíll þeirra hjóna vakti mikla athygli en bæði voru framarlega á sviði líkamsræktar vestanhafs. Þau gengu í hjónaband í Las Vegas haustið 2015 og áttu heima í ógnarstóru húsi í Los Angeles. Hjónabandið varð ekki langlíft því þau skildu sumarið 2016. Rúmu ári síðar, eða þann 25. ágúst í fyrra, lést Piana af völdum hjartaáfalls.
Sara fagnaði því á Instagram-síðu sinni þann 5. september síðastliðinn að þá væru liðin tvö ár frá því hún kynntist Chris. Hún sendi honum fallega ástarkveðju og sagði að „engillinn“ Chris hefði komið inn í líf sitt á hárréttu augnabliki. „Frá þessum degi hefur Chris staðið með mér í gegnum súrt og sætt; sýnt mér ást og stuðning, glatt mig þegar ég var niðurlút og látið mig hlæja þegar ég vildi gráta,“ sagði hún meðal annars.