Fasteignafélagið Reitir hefur fram til þessa einbeitt sér að atvinnuhúsnæði en hyggst nú víkka út starfsemina. Einn þáttur þess er að umbreyta atvinnuhúsnæði í íbúðir. Þá horfir félagið til þess að vera með uppbyggingu í sambandi við heilbrigðisþjónustu, þjónustu við aldraða og skóla. Forstjóri Reita sér mikla möguleika fyrir fasteignafélög í innviðauppbyggingu, sem geti létt byrðum af ríkinu. Guðni Aðalsteinsson, forstjóri Reita, er gestur Ólafs Arnarsonar í hlaðvarpi Markaðarins.
Hér er hægt að hlusta á brot úr þættinum:
„Við erum mikið búin að horfa á þessa vaxtarkrafta sem eru fram undan hjá okkur og hvernig við getum svona tengst þeim og þá kemur í ljós að það eru gríðarleg tækifæri og þörf fyrir fasteignafélög. Nú, hvað á ég við með því? Við sjáum til dæmis stöðuna á innviðum, við sjáum stöðuna á uppbyggingu fyrir eldri kynslóðina og þess háttar, að þetta eru allt verkefni sem krefjast mikið fjármagns og það er það sem fasteignafélög gera, þau eru með fjármagn.
Við höfum mikið leitt hugann að þessu að vera að vinna með lýðfræðilegum kröftum, öldrun þjóðarinnar, verkefni, tækifæri og áskorun. Við erum að tala um gríðarlega aukningu á fjölda aldraðra með allri þeirri þjónustu sem því fylgir, á sama tíma og það þýðir meiri eftirspurn í þeim markaði, á sama tíma hefur framboðið af húsnæði ekki aukist. Þriðji punkturinn í þessari vegferð er líka að nú eru kynslóðir að komast inn á ellilífeyrisaldurinn sem eiga bara mjög sterkan lífeyri, geta borgað fyrir góða þjónustu alveg eins og menn eru tilbúnir að eiga eða pening í bílinn þá eyða menn líka tíma og peningum í þessa einu heilsu sem við eigum. Þannig að við sjáum fyrir okkur breytt landslag og áherslur í samfélaginu og viljum gjarnan vera með í þeirri þróun.
Annar þáttur sem við lítum inn á er að það hefur verið mikil umframeftirspurn eftir húsnæði, fjölgun Íslendinga og allt þess háttar og við hugsum okkur, okkur langar að taka líka þátt í þeirri uppbyggingu og skila ákveðnum hlutum til samfélagsins þar sem samfélagið er að kalla eftir. Þannig við erum núna með á teikniborðinu um þúsund íbúðir víðsvegar um bæinn sem tengjast flestar einhverju atvinnuhúsnæði.“
Tengjast atvinnustarfsemi, segirðu, þannig að þið eruð ekki að fara inn á þennan hefðbundna íbúðamarkað?
„Jú, við erum að fara inn á hefðbundinn markað en sem sagt við erum ekki verktakar, þannig að við erum ekki að kaupa lóðir til að byggja íbúðir. En þetta hefur nú verið þannig að þetta hefur kannski verið lóðir þar sem hefur verið atvinnustarfsemi sem við umbreytum í íbúðir og þess háttar, þannig að það tengist þessari grunnstarfsemi sem við höfum alltaf verið í. Okkur langar líka að spila og vera meira með í þessari þróun sem mun eiga sér stað hér eins og annars staðar, lífsgæðakjarni, svona senior living, eins og það er kallað, þannig séð fólk sem er búið að skila sínu dagsverki kannski hóa sig saman í einhverju húsnæði sem býður upp á meiri þjónustu, oft kannski yfirbyggða garða og svoleiðis. Við erum að byggja fyrsta slíka verkefni núna niðri í Nauthólsvegi og þetta eru svona þættir sem við höfum svo mikinn áhuga á að taka þátt í. Uppbygging leikskóla. Þannig að við segjum, það eru gríðarleg tækifæri fyrir fasteignafélög sem skilgreina sig svolítið kannski vítt að taka þátt í þessari samfélagslegu þróun og það finnst mér alveg afskaplega skemmtilegt. Við vorum að skrifa undir samstarfssamning við Hjallastefnuna um daginn, rétt við hliðina á elliheimilinu, þannig að við tengjum saman þarna þessar tvær kynslóðir. Að koma að svona uppbyggingu þar sem er mikil þörf, það er alveg óskaplega gaman.“
Já og þú nefnir innviðina, þú náttúrlega ert að tala um innviði þegar þú ert að tala um þjónustu við eldri kynslóðina, leikskóla og svona, þetta er hluti af innviðum. En þú sérð fyrir þér að fasteignafélögin geti komið myndarlega inn í þessa innviðauppbyggingu sem fram undan er?
„Já, Ólafur, og geri það. Sjáum til dæmis núna þessa stefnu sem við erum að vinna eftir varðandi hjúkrunarheimili. Þar sér ríkið að það er auðveldara, hagkvæmara og hraðara að láta einkaaðila byggja húsið og reka það og leigja ríkinu. En að ríkið fari í þessi verkefni sjálft. Þetta er ekki það sem ríkið gerir kannski best varðandi viðhald og allt þetta. Þannig að það er búið að opna þessa leið að einkaframtakið, sem á kannski meira fjármagn en ríkið, fari í þessa uppbyggingu og því ber að fagna. Og ég sé fyrir mér að þetta módel sem er orðin alveg, ja, sátt og samlyndi um, eitthvað sem kannski var óhugsandi fyrir tíu árum, að þetta módel muni kannski vera nýtt annars staðar þar sem ríkið, eins og við vitum, muni ekki eiga aukafjármagn til þess að standa að nauðsynlegri innviðauppbyggingu og þetta er það sem er að gerast líka alls staðar annars staðar.“
Við sjáum náttúrlega að til dæmis núverandi ríkisstjórn, hún viðurkennir þetta. Hún er búin að setja á fót innviðafélag til að fara í einmitt samgönguframkvæmdir og það er einmitt til þess að ríkið þurfi ekki, að það séu ekki skattgreiðendur sem þurfi að fjármagna þetta með beinum hætti bara um leið og framkvæmdin fer fram.
„Og þetta mun vera með fleiri svona fjármagnsfreka þætti, hvort þetta séu vegir eða göng eða leikskólar eða aðrir svona innviðir að einkaaðilar, hvort það séu lífeyrissjóðir eða aðrir fjármagnseigendur, munu koma meira að þessu. Ríkið hefur bara nóg með sitt.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
