„Ekki viðunandi staða“ - Vilhjálmur hefur áhyggjur af stöðu Sjálfstæðisflokksins í borginni 

Vilhjálmur Þ. Vilhjálmsson, fyrrverandi borgarstjóri, hefur talsverðar áhyggjur af stöðu mála hjá Sjálfstæðisflokknum í borginni. Vilhjálmur var borgarstjóri Reykjavíkur á árunum 2006 til 2007 í valdatíð Sjálfstæðisflokks og Framsóknarflokks og oddviti flokksins á árunum 2003 til 2008.

Í aðsendri grein í

í dag viðrar Vilhjálmur áhyggjur sínar af stöðu mála hjá hans gamla flokki. Í gær kom út ný skoðanakönnun Maskínu, svokallaður borgarviti, þar sem í ljós kemur að Sjálfstæðisflokkurinn tapar fylgi frá fyrri könnun. Hann fengi nú 20% atkvæða en hafði 23% í síðustu könnun í mars síðastliðnum.

Eins og margir muna var Sjálfstæðisflokkurinn stærsti flokkurinn í síðustu kosningum með 25% fylgi en endaði samt í minnihluta. Sjálfstæðismönnum, ungum sem öldnum, líst ekki á þessa stöðu enda mælist Samfylkingin stærsti flokkurinn í borginni með 26% fylgi.

„Ljóst er að staða Sjálf­stæðis­flokks­ins í borg­ar­stjórn er óviðun­andi. Fylgið hef­ur um nokk­urt skeið verið í lág­marki, eða í kring­um 20%,“ segir Vilhjálmur sem hefur áður viðrað áhyggjur sínar af stöðu flokksins, nú síðast í grein í Morgunblaðinu þann 8. ágúst þar sem hann hvatti borgarstjórnarflokk Sjálfstæðisflokksins til að endurskoða vinnulag sitt.

„Það felst meðal ann­ars í því að ná betra sam­bandi við kjós­end­ur í Reykja­vík og kynna vel þau mál­efni sem borg­ar­full­trú­ar Sjálf­stæðis­flokks­ins leggja áherslu á í störf­um sín­um á vett­vangi borg­ar­stjórn­ar. Heim­sókn­ir á vinnustaði í hverf­um borg­ar­inn­ar eru í þessu sam­bandi mik­il­væg­ar,“ segir hann og heldur áfram:

„Það er auðvitað ekki viðun­andi staða fyr­ir Sjálf­stæðis­flokk­inn að fylgi við hann í höfuðborg­inni sé ekki meira en raun ber vitni. Ljóst er að mál­efn­um borg­ar­inn­ar er ekki vel stjórnað af meiri­hlut­an­um í borg­ar­stjórn. Þess sér merki víða í borg­inni. Borg­ar­full­trú­ar Sjálf­stæðis­flokks­ins verða að gera sér grein fyr­ir því að nú­ver­andi vinnu­lag þeirra er ekki lík­legt til að færa Sjálf­stæðis­flokkn­um auk­in áhrif á vett­vangi borg­ar­stjórn­ar. Bet­ur má ef duga skal.“

Vilhjálmur leggur til að borgarfulltrúar flokksins efni til funda í öllum hverfum borgarinnar með flokksbundnum Sjálfstæðismönnum þar sem staða flokksins í borginni verði brotin til mergjar.

„Einnig væri já­kvætt að borg­ar­stjórn­ar­flokk­ur­inn kynnti til­lög­ur sín­ar um auk­in tengsl við borg­ar­búa hvað varðar mik­il­væg mál­efni og aðgerðir í ein­stök­um hverf­um borg­ar­inn­ar. Ein­ung­is öfl­ug mál­efn­astaða legg­ur grunn­inn að því að Sjálf­stæðis­flokk­ur­inn verði ekki áfram í minni­hluta í borg­ar­stjórn.“