Staða ríkisstjórnarinnar versnar dag frá degi og því lengur sem dregst að boðað verði til kosninga því verri verður staðan, skrifar Ólafur Arnarson í nýjum Dagfarapistli á Hringbraut.

Hann segir formenn stjórnarflokkana sjá ofsjónum yfir uppgangi Samfylkingarinnar eftir að Kristrún Frostadóttir tók við formennsku. Þeir voni að þróunin muni snúast við en allt bendi hins vegar til þess að fylgi stjórnarflokkanna dragist áfram saman og byr Samfylkingarinnar aukist og bendir á nýjustu skoðanakönnun Maskínu máli sínu til stuðnings

Í umræddri skoðanakönnun reyndist Sjálfstæðisflokkurinn vera með 17,6 prósenta fylgi sem gæfi honum 12 þingmenn en nú hefur flokkurinn 17 menn á þingi. Ef niðurstaða kosninga yrði með þessum hætti félli bæði forseti Alþingis og formaður þingflokks sjálfstæðismanna af þingi, auk Hildar Sverrisdóttur, Birgis Þórarinssonar og Teits Björns Einarssonar sem kom inn sem varamaður á kjörtímabilinu. Framsókn myndi missa hálfan hálfan þingflokk sinn og einnig Vinstri græn sem fengju einungis fjóra menn kjörna, trúlega engan utan höfuðborgarsvæðisins.

Þrátt fyrir þetta virðist ekki vera neitt fararsnið á Bjarna Benediktssyni eða Katrínu Jakobsdóttur. Sjálfstæðisflokkurinn er búinn að missa einn þriðja frá síðustu kosningum og er langt frá því 35 til 40 prósent fylgi sem hann gekk að vísu um árabil áður en Bjarni Benediktsson tók við formennsku þar á bæ. Vinstri græn mælast nú með 6,4 prósent og gætu sem hægast dottið út af Alþingi og þar með dáið drottni sínum.

Ólafur segir nýleg viðtöl við Katrínu og Bjarna gefa til kynna að þau hyggist einfaldlega njóta hvers dags, líta sem minnst til baka, halda Kristrúnu sem lengst frá embætti forsætisráðherra og hverfa svo af vettvangi í örugg störf erlendis eða hér á landi – en þá verði þau reyndar að sjá á eftir fínu ráðherrabílunum og bílstjórunum.

Það breyti litlu fyrir Bjarna en Katrín muni hins vegar þurfa að finna til gamla reiðhjólið sem hún flaggaði mjög í upphafi ferils síns, þá manneskja fólksins.

Dagfara í heild má lesa hér.