Bjarni Benediktsson er ekki öfundsverður maður þessa dagana. Hann stendur frammi fyrir því að þurfa að fórna sínum traustasta stuðningsmanni til að efna loforð við Guðrúnu Hafsteinsdóttur um að gera hana að dómsmálaráðherra.

Í nýjum dagfarapistli á Hringbraut segir Ólafur Arnarson Bjarna standa frammi fyrir nokkrum kostum í þessu máli og enginn þeirra sé góður. Hann geti sem fyrr segir fórnað Jóni Gunnarssyni til að efna loforðið við Guðrúnu. Hann geti líka svikið Guðrúnu og haft Jón áfram. Einnig geti hann stigið sjálfur til hliðar til að rýma til í ráðherraliði flokksins að jafnvel bara ákveðið að skella sér út í sumarið og bíða þess sem verða vill.

Ólafur segir ráðherrasirkusinn í kringum „ísdrottninguna“ úr Hveragerði hafa gengisfellt bæði hana og ráðherratitilinn sem hann býst við að hún fái innan tíðar. Hann býst líka við að þessu máli verði gerð góð skil í næsta áramótaskaupi.

Meginefni pistilsins fjallar hins vegar um það hve miklum fríum stjórnmálastéttin úthlutar sjálfri sér. Jólafríið er 37 dagar og páskafríið langt og gott. Og nú geta þingmenn ekki beðið eftir því að halda út í 110 daga sumarfrí.

Dagfara í heild má lesa hér.