Þrátt fyrir að Ísland sé eitt þeirra landa með flesta rauðhærða miðað við höfðatölu eru ekki miklar líkur á að þeir nái að láta ljós sitt skína á Alþingi næstu fjögur árin.

Einungis tveir einstaklingar með rautt hár eru í efstu þremur sætum flokka í alþingiskosningunum sem fram fara í dag. Einungis einn þessara einstaklinga virðist vera leiðinni á þing og því verður um að ræða 62 einstaklinga ekki með rautt hár og einn einstakling með rautt hár á næsta Alþingi.

Þórunn Sveinbjarnardóttir leiðir lista Samfylkingarinnar í Suðvesturkjördæmi og verður hún líklegast eini rauðhærði þingmaðurinn. Samfylkingin fékk einn mann inn á þing í því kjördæmi í kosningunum árið 2017 og er hún nokkuð örugg inn á þing.

Í þriðja sæti á lista Sósíalistaflokksins í Norðausturkjördæmi er Guðrún Þórsdóttir, menningarstjóri og ráðgjafi. Hún er einnig rauðhærð en ansi ólíklegt er að hún muni komast inn á þing.

Sósíalistar hafa verið að mælast með í kringum fimm prósent fylgi og ættu samkvæmt nýjustu könnun MMR að fá inn fjóra þingmenn.

Samkvæmt grein Guardian frá árinu 2013 eru 5-9% Íslendinga rauðhærðir. Ef aðeins einn þingmaður af 63 er rauðhærður gera það rétt rúmlega 1,5%.

Uppfært:

María Lilja Þrastarsdóttir er einnig í þriðja sæti hjá Sósíalistum en í Reykjavík norður. Hún benti á þetta á Twitter-síðu sinni í dag og bætir við að fjöldi fólks með rautt hár, eins og hún sjálf, sé á listum Sósíalistaflokksins

Einungis var miðað við efstu þrjú sæti á lista flokka en María fór framhjá blaðamanni við fyrstu athugun.

EHH RANGT DV!
Sósíalistar í framboði sem eru rauðhærð (ekki tæmandi listi):
ÉG, Aldís Scram, Ása Lind, Árni Múli, Unnur María, Auður Trausta, Unnur Rán, Einar Már, Katrín Baldurs, Jökull Sólberg… pic.twitter.com/8ijr6E2B2z

— ☭ María Lilja ☭ (@1312Mayhem) September 25, 2021