Tekist var á af fullri hörku í myndveri Hringbrautar en þeir Guðlaugur Þór Þórðarson utanríkisráðherra og Gunnar Smári Egilsson formaður Sósíalistaflokksins mættust í Pólitíkinni með Páli Magnússyni.

Að öllum líkindum er leitun að mönnum sem eru jafn langt frá hvor öðrum á hinum hefðbundna hægri/vinstri skala stjórnmálanna. Guðlaugur Þór er fyrrum formaður Sambands Ungra Sjálfstæðismanna og hefur vaktað hægri væng stjórnmálanna innan Sjálfstæðisflokksins. Hefur Guðlaugur meðal annars staðið fyrir aukinni samvinnu yfir Atlantshafið, meðal annars í gegnum Atlantshafsbandalagið. Gunnar Smári stendur svo vaktina hinum megin. Vill Ísland úr NATO, þvertekur fyrir aukinn einkarekstur og vill að hið opinbera auki umsvif sín til muna.

Ef fram fer sem horfir mun Sósíalistaflokkurinn ná yfir 5% þröskuldinn og verða þá Guðlaugur og Gunnar Smári kollegar á þinginu næstu fjögur ár.

Í þættinum fóru þeir félagar yfir utanríkismál, hugmyndafræði sósíalismans, fjölmiðla, skoðanakannanir og margt fleira. Brot úr þættinum má sjá hér að neðan.

Þátturinn er svo á dagskrá Hringbrautar í kvöld klukkan 19:30 og aftur klukkan 21:30.