Launahækkanir á næstu misserum, samkvæmt kjarasamningum, grafa undan getu vinnumarkaðarins til að skapa ný störf. Þetta er mat Jóns Bjarka Bentssonar, aðalhagfræðings Íslandsbanka, sem segir að það hafi ítrekað sýnt sig, hérlendis og erlendis, að miklar nafnlaunahækkanir án samsvarandi framleiðniaukningar skili ekki varanlegri kaupmáttaraukningu.

Markaður Fréttablaðsins skýrir frá þessu í dag. Finnur Oddsson, forstjóri Haga, tók í sama streng og sagði að slíkar hækkanir rýri einfaldlega kaupmátt allra landsmanna.

Á síðustu tólf mánuðum hefur launavísitala Hagstofunnar hækkað um rúmlega sex prósent en á sama tíma hefur hagkerfið skroppið saman. Í janúar eru frekari launahækkanir á döfinni. „Þessar miklu launahækkanir gætu knúið fyrirtæki til að segja upp starfsfólki sem ella þyrfti ekki að segja upp,“ er haft eftir Yngva Harðarsyni, hagfræðingi hjá greiningarfyrirtækinu Analytica.

Á næsta ári stefnir í að launakostnaður hér á landi, sem hlutfall af vergri landsframleiðslu, verði nálægt 70% en svo hátt gildi hefur ekki sést frá 2007.