Önnur umræða um innleiðingu þriðja orkupakkans stóð til klukkan 6.18 í morgun á Alþingi, en þingmenn Miðflokksins héldu uppi málþófi í alla nótt um málið, en þeir, ásamt Flokki fólksins, eru alfarið á móti innleiðingunni.
Nokkrir þingmenn Miðflokksins voru enn á mælendaskrá þegar umræðum var frestað í morgun, en fimm þeirra sátu fyrir á mynd í morgun og birtu á samfélagsmiðlum, þreytulegir nokkuð.
Á Facebooksíðu Miðflokksins segir að þetta hafi verið lengsti samfelldi þingfundur (málþóf) Íslandssögunnar, og einnig sá sem lengst hafi náð fram á morgun:
„Fimm þingmenn Miðflokksins kl. 06:30 eftir að hlé var gert á umræðu um 3. orkupakkann.
Enn hafa ekki fundist dæmi um að þingfundur hafi staðið eins lengi fram á nótt/morgun og ekki heldur um eins langa samfellda umræðu.
Þó voru þeir rétt að byrja.“
Líklega hefur Helga Bernódussyni, fráfarandi skrifstofustjóra Alþingis ekki verið skemmt yfir þessu uppatæki Miðflokksins, en hann greindi frá því í ræðu á dögunum, að réttast væri að leggja málþóf af, þar sem það ætti ekkert skylt við málfrelsi; ekki frekar en „nauðgun við kynfrelsi“, en Helgi fékk skammir fyrir frá femínistum fyrir þá líkingu sína.
