Samkvæmt Twitter-tísti Donalds Trump Bandaríkjaforseta fyrir stundu, hefur hann vikið Rex Tillerson utanríkisráðherra úr starfi. Við tekur fyrrum forstjóri CIA leyniþjónustunnar, Mike Pompeo. Við starfi hans hjá CIA tekur Gina Haspel og verður hún fyrsti kvenkyns forstjóri CIA.
Tillerson tók undir orð Theresu May, forsætisráðherra Bretlands í gær, um að Rússar væru líklega ábyrgir fyrir eiturefnaárásinni í Salisbury í síðustu viku, en Hvíta húsið hefur ekki viljað ganga svo langt í yfirlýsingum sínum vegna málsins.
Telja stjórnmálaskýrendur ytra þó að málið tengist yfirvofandi friðarviðræðum við Norður-Kóreu, en haft var eftir ónefndum aðstoðarmanni innan Hvíta hússins að nú væri rétti tíminn til að skipta um mann í brúnni.
Trump sagði sjálfur að þeim kæmi vel saman og hann mæti „gáfur“ Tillerson.
Tillerson hefur verið í opinberri heimsókn í Afríku undanfarna daga og var ekki látinn vita af starfslokum sínum að sögn Steve Goldstein, eins undirmanns Tillerson. Hvíta húsið segir að Trump hafi tilkynnt Tillerson um uppsögnina á föstudag. Tillerson er tuttugasti embættismaðurinn sem Trump víkur úr starfi, eða segir af sér, í stjórnartíð Trump. Hann hefur verið forseti í 417 daga.
Hér er listi yfir þá sem Trump hefur rekið, eða sem hafa sagt af sér:
James Comey, (FBI) Sally Yates (Ríkissaksóknari), Michael Flynn (ráðgjafi), Preet Bharara (saksóknari), Walter Shaub (ráðuneytisstjóri), Micheal Dubke (samskiptastjóri), Reince Priebus (starfsmannastjóri), Sean Spicer (fjölmiðlafulltrúi), Micheal Short (aðstoðar-fjölmiðlafulltrúi), Anthony Scaramucci (samskiptastjóri), Steve Bannon (áróðursmeistari), Sebastian Gorka (aðstoðarmaður), Tom Price (heilbrigðisráðherra), Omarosa Manigault (aðstoðarkona), Andrew McCabe (aðstoðarforstjóri FBI), Rob Porter (ráðgjafi), David Sorenson (ræðuhöfundur), Hope Hicks (samskiptastjóri/ráðgjafi), Gary Cohn (hagfræðiráðgjafi), Rex Tillerson (utanríkisráðherra).
Mike Pompeo, Director of the CIA, will become our new Secretary of State. He will do a fantastic job! Thank you to Rex Tillerson for his service! Gina Haspel will become the new Director of the CIA, and the first woman so chosen. Congratulations to all!
— Donald J. Trump (@realDonaldTrump) March 13, 2018
