Fréttablaðskönnunin sem birtist í dag er afskaplega vond fyrir ríkisstjórnina og stjórnarflokkana, og hún kemur líka á vondum tíma þegar mikill órói er á stjórnarheimilinu. Sérstaklega er hún vond fyrir Samfylkinguna sem mælist ekki með nema 23 prósenta fylgi af þeim sem tóku afstöðu.
Sjálfstæðisflokkurinn er aftur farinn að sjá tölur sem líta út eins og þegar flokkurinn var í því fylgi sem hann á að venjast en Framsókn stendur í stað. Óánægjufylgið leitar ekki þangað.
Hins vegar er ein tala mjög áberandi í skoðanakönnuninni. Það eru þeir sem ekki taka afstöðu. Það voru 40 prósent sem ekki lýstu yfir stuðningi við neinn flokkanna.
Það er ansi há tala – en segir sína sögu um þá kreppu sem íslenska flokkakerfið er í.
