Landsréttur hefur fyrirskipað Héraðsdómi Suðurlands að taka til meðferðar Kiðjabergsmálið svokallaða sem dómurinn hafði vísað frá vegna óskýrleika ákæru. Taldi rétturinn að lýsing í ákæru væri ekki svo óljós að það gerði ákærða erfitt að átta sig á sakargiftum á hendur sér og að taka til varna.
Atvikið átti sér stað í sumarhúsi í landi Kiðjabergs í Grímsnesi þann 20. apríl árið 2024. Lést þar litháískur maður að nafni Victoras Buchovskis og var landi hans Gediminas Saulys ákærður fyrir sérstaklega hættulega líkamsárás.
Sagði í ákærunni að atlagan hafi beinst að höfði, hálsi og líkama Victoras. Hann hafi verið sleginn tvisvar í höfuð þegar hann sat á stól. Blæddi mikið úr höfði, hálsi og eyrum. Lést hann að völdum heilaáverka.
Þann 29. janúar kom niðurstaða Héraðsdóms Suðurlands. Var málinu vísað frá.
„Af öllu framansögðu er það mat dómsins að verknaðarlýsing ákæru lýsi ekki með fullnægjandi hætti hvernig og með hvaða athöfnum háttsemi ákærða á að hafa valdið þeim áverkum sem tilgreindir eru í ákæru og leiddu til andláts A þannig að varðað gæti við 2. mgr. 218. gr. almennra hegningarlaga nr. 19/1940. Þar sem ákæran uppfyllir við svo búið ekki skilyrði 1. mgr. 152. gr. laga nr. 88/2008 verður ekki hjá því komist að vísa málinu frá dómi,“ sagði í dóminum.
Landsréttur tók undir að lýsing þyrfti að vera eins skýr og efnisatriði ákæru glögg þá séu dómafordæmi fyrir því að mál eins og þetta séu tekin fyrir.
„Verður af framangreindum dómum meðal annars ráðið að þegar gögn, sem aflað hefur verið við rannsókn máls, styðja að brot hafi verið framið af ákærða, án þess að taka megi af skarið með hvaða hætti eða hvenær það hafi nákvæmlega gerst, geti verið réttlætanlegt að lýsa sakargiftum almennar en ella,“ segir í niðurstöðu Landsréttar. Og einnig: „Með kröfu um nákvæmari lýsingu á ætlaðri framgöngu ákærða er hætt við að ákærandi hefði verið settur í þá stöðu að þurfa um of að geta í eyðurnar og setja fram tilgátur um hvaða verknaðaraðferðum kunni að hafa verið beitt við atlöguna, án þess að hann teldi gögn málsins veita þeim næga stoð.“
